सांगली : मुदत संपलेल्या जिल्ह्यातील अ वर्गातील ७२ सहकारी संस्थांच्या निवडणुकीचा मार्ग शासन आदेशाने मोकळा झाला आहे. निवडणुकीचा कार्यक्रम २० सप्टेंबरला जाहीर होणार आहे.
राज्य सहकारी निवडणूक प्राधिकरणाने विभागीय सहनिबंधक व जिल्हा उपनिबंधकांना सोमवारी याबाबतचे आदेश दिले. त्यानुसार जिल्ह्यात पहिल्या टप्प्यात अ वर्गातील ७२ सहकारी संस्थांची निवडणूक होणार आहे. याच वर्गातील एका सहकारी बँकेवर सध्या प्रशासक असल्याने ती संस्था वगळून अन्य संस्थांच्या निवडणुकांचा कार्यक्रम येत्या २० सप्टेंबरला जाहीर होईल. जिल्हा मध्यवर्ती बॅँकेच्या निवडणुकीसाठी सध्या मतदारयाद्यांचा कार्यक्रम सुरू आहे. त्याची प्रक्रिया यापूूर्वीच सुरू झाल्याने बँकेचा निवडणूक कार्यक्रमही लवकरच जाहीर होईल.
कोरानामुळे राज्यातील मुदत संपलेल्या सहकारी संस्थांची निवडणूक आतापर्यंत पाच वेळा लांबणीवर टाकण्यात आली होती. ऑगस्टअखेरपर्यंत ही मुदतवाढ होती. ती संपताच आता तत्काळ निवडणुका घेण्याचे आदेश सहकार विभागाला दिले आहेत.
जिल्ह्यात ३१ डिसेंबर २०२० अखेर निवडणुकीस पात्र असलेल्या १५२८ सहकारी संस्था आहेत. जिल्हा बँक, पलूस व जत अर्बन बँक, तसेच विकास सोसायट्या, दूध संस्था, खरेदी-विक्री संस्था व अन्य सहकारी संस्थांचा यात समावेश आहे. जिल्हा मध्यवर्ती बँकेची निवडणूक विभागीय सहनिबंधकांच्या अखत्यारीत आहे, तर अन्य संस्थांची निवडणूक जिल्हा उपनिबंधक कार्यालयाकडून होणार आहे. क व ड वर्गातील संस्थांची निवडणूक प्रक्रिया तालुका उपनिबंधकांच्या अखत्यारीत होणार आहे.
कोट
शासनाचे आदेश प्राप्त झाले आहेत. नामनिर्देशनपत्रांची प्रक्रिया सुरू होऊन थांबलेली एकही संस्था आपल्याकडे नाही. त्यामुळे ७२ संस्थांच्या निवडणुकांची प्रक्रिया स्थगित टप्प्यापासून सुरू होईल.
- नीळकंठ करे, जिल्हा उपनिबंधक, सांगली