सांगली : जिल्हा मध्यवर्ती बॅँकेच्या प्रारूप मतदार यादीवर ५० हरकती दाखल झाल्या आहेत. यावर बुधवारी १५ सप्टेंबरला सुनावणी होऊन २२ सप्टेंबरला निकाल दिला जाणार आहे. त्यानंतर मतदारयादी अंतिम होऊन निवडणूक कार्यक्रम जाहीर केला जाणार आहे.
सांगलीसह राज्यातील १२ जिल्हा मध्यवर्ती सहकारी बॅँकांच्या निवडणुकीची प्रक्रिया सुरू झाली आहे. एकाच वेळी ही प्रक्रिया सुरू झाली आहे. सांगली, सातारा व कोल्हापूर जिल्ह्यांसाठी कोल्हापूर विभागीय सहनिबंधकांनी प्रारूप मतदारयादी जाहीर केली आहे. सांगली जिल्हा बॅँकेच्या प्रारूप मतदार यादीत २ हजार ५७३ मतदार सभासद आहेत. यात २ हजार २१९ संस्था सभासद आहेत. बॅंकेच्या या प्रारूप यादीवर हरकती दाखल करण्यासाठी दि. १३ सप्टेंबरपर्यंत मुदत होती. या मुदतीत ५० हरकती दाखल झाल्या आहेत. यात सभासद मयत झाल्याबाबत २६, यादीत नाव नसल्याच्या १२, सभासदाने राजीनामा दिल्याची एक, प्रतिनिधीच्या नावावर आक्षेप असल्याच्या चार व इतर सात हरकतींचा समावेश आहे. गट अ मध्ये १२, क १ मध्ये ३, क-२ मध्ये २, क - ३ मध्ये १२ व गट क ४ मधील १२ हरकती आहेत. यावर बुधवारी सुनावणी होऊन २२ सप्टेंबरला निर्णय देण्यात येईल. त्यानंतर २७ सप्टेंबरला मतदारयादी अंतिम केली जाणार आहे.
या हरकतींवर १५ रोजी विभागीय सहनिबंधक कोल्हापूर यांचे कार्यालयात सुनावणी होणार आहे. यासाठी संबंधितांना नोटिसा देण्यात आल्या आहेत. सुनावणीनंतर २२ पर्यंत हरकतींवर निकाल दिला जाणार आहे. २७ रोजी बॅँकेची अंतिम मतदारयादी जाहीर होणार असून त्यानंतर दहा दिवसांत बॅँकेचा निवडणूक कार्यक्रम घोषित होणार आहे.