उमेदवारांची झुंबड उडाली; सांगली जिल्ह्यात आठ नगरपालिकांच्या १८९ जागांसाठी १६७८ अर्ज दाखल

काँग्रेसच्या दोन उमेदवारांनी घेतले भाजपचे ‘कमळ’ 

सांगली : जिल्ह्यातील उरूण-ईश्वरपूर, आष्टा, तासगाव,पलूस, विटा, जत नगर परिषद आणि आटपाडी, शिराळा नगरपंचायतींमधील नगरसेवकपदाच्या १८१ जागांसाठी एक हजार ६७८ तर नगराध्यक्षपदाच्या आठ जागांसाठी ११० उमेदवारांनी अर्ज दाखल केले आहेत.

या निवडणुकीत दिग्गज इच्छुकांना नेत्यांनी बाजूला ठेवले आहे. अर्ज दाखल करण्याचा शेवटचा दिवस असल्याने चांगलीच झुंबड उडाली होती. दरम्यान तासगाव नगरपरिषदेसाठी रात्री उशिरापर्यंत अर्ज दाखल करण्याची प्रक्रिया चालू होती.

नगरपालिका निवडणुकीसाठी सोमवारी उमेदवारी अर्ज दाखल करण्याचा अखेरचा दिवस होता. काँग्रेस, राष्ट्रवादी, भाजप, शिंदेसेना, उद्धवसेनेसह या सर्वांच्यात जागा वाटपाबाबत विलंब होत असल्याने इच्छुकांची घालमेल वाढली होती. अर्ज दाखल झाल्यानंतर राष्ट्रवादी, राष्ट्रवादी काँग्रेस शरदचंद्र पवार पक्ष, भाजप व काँग्रेस यांनी आपल्या उमेदवारांची यादी जाहीर केली. बहुतांशी विद्यमान नगरसेवकांना यंदा डच्चू देण्यात आला आहे. 

जत नगर परिषदेच्या निवडणुकीसाठी आज अखेर नगरसेवकसाठी १५४ उमेदवारी अर्ज तर नगराध्यक्षपदासाठी एकूण १० उमेदवारी अर्ज दाखल झाले. नगराध्यक्ष पदासाठी काँग्रेसने सांगली बाजार समितीचे सभापती सुजय शिंदे यांना उतरविले आहे. भाजपकडून रवींद्र आरळी, तर राष्ट्रवादीकडून सांगली बाजार समितीचे माजी सभापती सुरेश शिंदे यांचा अर्ज दाखल केला आहे. या ठिकाणी महायुती, महाआघाडीत बिघाडी झाली असून, दोन्ही राष्ट्रवादीची आघाडी झाली आहे. 

पलूस अर्ज दाखल करण्याचा शेवटचा दिवस असल्यामुळे उमेदवार आणि नेत्यांची तोबा गर्दी पाहायला मिळाली. नगराध्यक्ष पदासाठी ०९ जणांनी, तर नगरसेवक पदासाठी १४३ अर्ज दाखल केले. उरूण-ईश्वरपूर नगर परिषदेच्या निवडणुकीसाठी एकूण नगराध्यक्षपदासाठी १४, तर नगरसेवकपदासाठी २७२ अर्ज आले. या ठिकाणीची निवडणूक राष्ट्रवादी काँग्रेस शरदचंद्र पवार पक्ष आणि भाजपच्या नेत्यांनी प्रतिष्ठेची केली आहे. 

शिराळ्यात नगरसेवक पदासाठी १७६, तर नगराध्यक्ष पदासाठी १७ असे उमेदवारी अर्ज दाखल झाले आहेत. अर्ज दाखल केलेल्यामध्ये अपक्ष उमेदवार आणि तरुण उमेदवारांची संख्या सर्वाधिक आहे. आष्टा नगराध्यक्षपदासाठी आष्टा शहर विकास आघाडीचे विशाल शिंदे, महायुतीचे प्रवीण माने यांच्यासह ११ उमेदवार, तर नगरसेवकपदासाठी २०६ उमेदवारांनी अर्ज दाखल केले. 

आटपाडी नगरपंचायतीसाठी प्रथमच निवडणूक होणार असून, चुरशीने नगरसेवक पदासाठी १९७, तर नगराध्यक्षपदासाठी २३ अर्ज दाखल झाले. तासगाव तालुक्यात रात्री साडेआठ वाजेपर्यंत उमदेवारी अर्ज स्वीकारण्याची प्रक्रिया चालूच होती. 

आज अखेर दाखल झालेले उमेदवारी अर्ज 

नगर परिषद / नगरपंचायत : सदस्यासाठी अर्ज : नगराध्यक्षपदासाठी अर्ज 

• उरूण-ईश्वरपूर /२७२/१४
• विटा /२३०/१४
• आष्टा /२०६/११
• जत /१५४/१०
• पलूस /१४३/०९
• शिराळा /१७६/१७
• आटपाडी /१९७/२२
• तासगाव /१९०/१३

काँग्रेसच्या दोन उमेदवारांनी घेतले भाजपचे ‘कमळ’ 

विटा नगर परिषद निवडणुकीसाठी उमेदवारी अर्ज दाखल करण्याच्या अखेरच्या दिवशी भाजप, शिंदेसेना व राष्ट्रवादी काँग्रेस अजित पवार गट पक्षांतील दिग्गजांचे उमेदवारी अर्ज दाखल झाले. या निवडणुकीत महाविकास आघाडीला एकही उमेदवार मिळाला नाही. काँग्रेसच्या दोन उमेदवारांनी भाजपचे ‘कमळ’ हातात घेतले आहे.

आज अर्जाची छाननी

मंगळवार, १८ रोजी सकाळी १० वाजता या अर्जांची छाननी सुरू होईल आणि सायंकाळी ६ पर्यंत अवैध अर्ज काढले जातील. तर, बुधवार, १९ ते २१ या काळात उमेदवारी मागे घेण्याची मुदत राहील, असे निवडणूक निर्णय अधिकाऱ्यांनी सांगितले.