- शाळांना शनिवारीच निकाल पाहता येणार
लोकमत नेट न्यूजवर्क
रत्नागिरी : महाराष्ट्र राज्य माध्यमिक व उच्च माध्यमिक शिक्षण मंडळातर्फे दहावी परीक्षेचा निकाल शुक्रवारी दुपारी जाहीर झाला. कोकण बोर्डाचा शंभर टक्के निकाल जाहीर झाल्याचा आनंद सर्वांना झाला असला तरी बोर्डाची साईट दुपारी क्रॅश झाल्याने प्रत्यक्ष शाळांचा, विद्यार्थ्यांचा निकाल पाहता आला नाही. त्यामुळे पालक, विद्यार्थी हिरमुसले. शिक्षक, शिक्षकेतर कर्मचाऱ्यांनी सायंकाळपर्यंत प्रतीक्षा करून अखेर घर गाठले.
कोरोनामुळे प्रत्यक्ष परीक्षा घेता आल्या नाही; मात्र, अंतर्गत मूल्यमापनानुसार निकाल जाहीर करण्यात आला आहे. महाराष्ट्र राज्य माध्यमिक व उच्च माध्यमिक शिक्षण मंडळातर्फे नियोजित तारखेला, नियोजित वेळेत निकाल जाहीर केला, शंभर टक्के निकाल लागल्याचे मंडळाने घोषित केले. शाळा, विद्यार्थीनिहाय निकाल पाहण्यासाठी एकाच वेळी साईटवर असंख्य लोकांनी भेट दिल्याने साईट क्रॅश झाल्याचे मंडळातर्फे घोषित करण्यात आले. दुपारी एक वाजल्यापासून पालक, विद्यार्थी मोबाईल, संगणकाद्वारे निकाल पाहण्यासाठी उत्सुक होते. खूप वेळ प्रयत्न करूनही संकेतस्थळ सुरू होत नव्हते, अखेर मंडळातर्फे संकेतस्थळ क्रॅश झाल्याचे घोषित करण्यात आले. परंतु, सायंकाळपर्यंत संकेतस्थळ सुरू झाले नाही. त्यामुळे प्रयत्न करूनही कंटाळलेल्या शाळांचे मुख्याध्यापक, शिक्षक, शिक्षकेतर कर्मचाऱ्यांनी अखेर घर गाठले. दुपारपासून पालक, विद्यार्थी मात्र शाळेत फोन करून संकेतस्थळ सुरू झाले का? याबाबत वारंवार विचारणा करीत होते. मंडळाकडून सायंकाळी लवकरच संकेतस्थळ सुरू होईल असे घोषित करण्यात आल्यानंतर दिलासा प्राप्त झाला असला तरी पालक, विद्यार्थी मात्र प्रयत्नशील होते.
--------------------
अंतर्गत मूल्यमापनानुसार निकाल जाहीर करण्यात आला असला, तरी उत्सुकता मात्र होती. सकाळपासून शिक्षक, शिक्षकेतर कर्मचाऱ्यांसह शाळेत सर्व उपस्थित होतो. मुलांचे, पालकांचेही सातत्याने फोन येत होते. मात्र, दुपारी मंडळाचे संकेतस्थळ सुरू झाले नाही. सायंकाळपर्यंत सतत प्रयत्न करीत होतो, अखेर संकेतस्थळ सुरू न झाल्याने नाराजीने शिक्षक, कर्मचारी घरी गेले; मात्र उद्या निकाल पाहता, येईल अशी अपेक्षा आहे.
- गायत्री गुळवणी, मुख्याध्यापिका, रा. भा. शिर्के, प्रशाला, रत्नागिरी
---------------------
संकेतस्थळ सुरू होत नसल्याने मुले गोंधळली. सातत्याने प्रयत्न करून कंटाळलेल्या मुलांनी, पालकांनी अखेर शाळेत फोन करायला सुरुवात केली, कुठे, कसे पाहू अशी विचारणा करीत होती. मात्र, तांत्रिक समस्या असल्याने बोर्डाकडून त्याबाबत काम सुरू असल्याचे सांगण्यात आले. शाळेचा, मुलांचा निकाल आता शनिवारीच पाहायला मिळणार आहे.
- प्रतापसिंह चव्हाण, मुख्याध्यापक, श्रीमान गोविंद गंगाधरभाऊ पटवर्धन स्कूल रत्नागिरी.
----------------------
कोरोनामुळे शैक्षणिक सत्राची सुरुवात ऑनलाईन झाली. दिवाळीनंतर प्रत्यक्ष शाळा सुरू झाल्या. ऑनलाईन शिक्षणाचा अनुभव नवीन होता. अभ्यास करून परीक्षा झाली नाही; मात्र मूल्यांकनानुसार पास हा ही अनुभव वेगळा असल्याने निकाल पाहण्याची उत्सुकता होती. परंतु तो आनंद संकेतस्थळ सुरू न झाल्याने घेता आला नाही.
- तनुजा पवार, विद्यार्थिनी
----------------------
निकाल ऑनलाईन जाहीर करण्यात येणार असल्याने संकेतस्थळावर एकाच वेळी असंख्य लोक भेट देणार हे गृहीतच होते. मात्र संकेतस्थळ क्रॅश झाले तर काय? अशा तांत्रिक समस्यांबाबतही वेळीच काळजी घेणे गरजेचे होते. कोरोनामुळे कोकण बोर्डाचा शंभर टक्के निकाल लागल्याचा आनंद झाला, मात्र पाल्याचा प्रत्यक्ष निकाल पाहण्याची जी उत्सुकता होती, तो अनुभव घेता आला नाही.
- रोहित सावंत, पालक