आरोग्य विभागाची करडी नजर

चिपळूण पालिका : उघड्यावर शौच करणाऱ्यांना लगाम

चिपळूण : येथील नगर परिषदेला हागणदारीमुक्त पुरस्कार मिळाला असून, उघड्यावर शौचास न बसण्याबाबत कडक धोरण अवलंबण्यात आले आहे. शुक्रवारी रात्री ८.३०च्या दरम्यान वाशिष्ठी नदीकिनारी एक तरुण शौचास बसल्याचे निदर्शनास आल्याने या तरुणाला आरोग्य विभागाच्या कर्मचाऱ्यांनी चांगलीच तंबी दिली. या प्रकारावरुन रहिवाशी व कर्मचारी यांच्यात शाब्दिक चकमक व धक्काबुक्की झाली. शहरातील वाशिष्ठी नदीकिनारी स्वामी समर्थनगर ही वस्ती असून, या ठिकाणी गेल्या अनेक वर्षापासून शौचालयाची सुविधा नाही. त्यामुळे नदी परिसराचा शौचास बसण्यासाठी वापर केला जात होता. मात्र, चिपळूण शहर स्वच्छ ठेवण्याच्या दृष्टीने शहरातील विविध भागात उघड्यावर शौचास बसणाऱ्यांवर आरोग्य विभागातर्फे करडी नजर ठेवण्यात आली आहे. वाशिष्ठी नदीकिनारी एक तरुण शौचास बसल्याचे आरोग्य विभागाच्या कर्मचाऱ्यांच्या निदर्शनास आले. त्यामुळे संबंधितांनी त्या तरुणास चांगलेच हटकले. हा प्रकार रहिवाशांना समजताच ते संतप्त झाले. संबंधित कर्मचारी व रहिवाशी यांच्यात शाब्दिक चकमक व धक्काबुक्की झाली. या प्रकरणी आरोग्य विभागाचे कर्मचारी रमेश बुरटे यांनी पोलीस ठाण्यात तक्रार दिली. या तक्रारीनुसार रज्जाक सय्यद (३४ रा. गोवळकोट रोड), मल्लिक सय्यद (१९ रा. पेठमाप) यांच्यावर पोलिसांनी प्रतिबंधात्मक कारवाई केली. झालेल्या प्रकाराबाबत शनिवारी अंदाजे १०० ते १२५ रहिवाशांनी नगर परिषदेवर धडक दिली. चिपळूण पालिकेतील राष्ट्रवादीचे गटनेते राजेश कदम, आरोग्य समितीच्या सभापती रुक्सार अलवी, बांधकाम सभापती बरकत वांगडे यांची भेट घेऊन कर्मचाऱ्याकडून झालेल्या प्रकाराबाबत तीव्र नाराजी व्यक्त केली. मात्र, आम्हाला शौचालय नसल्याने आम्ही काय करायचे? असा सवालही यावेळी रहिवाशांनी केला. शिवसेनेचे विधानसभा क्षेत्राध्यक्ष बाळा कदम यांनीही येथे भेट देऊन घटनेची माहिती जाणून घेतली. स्वामी समर्थनगर येथे थोड्या दिवसातच शौचालय बांधण्याबाबत नगर परिषद प्रशासनाने सहमती दर्शवली आहे. शहराचे नाव बदनाम होईल असे कृत्य करु नये अशी सूचनाही गटनेते राजेश कदम यांनी रहिवाशांना केली. (वार्ताहर)