आवाशी : माणी (ता. खेड) येथे विनापरवाना सुरु असलेल्या ‘त्या’ डांबर प्लांटबद्दल आता ग्रामपंचायत सदस्यच आक्रमक झाले आहेत. हा प्लांट बंद ठेवणे गरजेचे असतानाही तेथे कामकाज सुरु असल्याने या सदस्यांनी संताप व्यक्त केला आहे.
खेड तालुक्यातील माणी गावच्या हद्दीत बौद्धवाडीनजीक खेड सवेणी - माणी - लवेल जिल्हा परिषद रस्त्याकडेला मागील वीस वर्षांपासून हा प्लांट सुरु आहे. क्रशर व डांबर प्लांटला ग्रामपंचायतीसह अन्य शासकीय यंत्रणांची परवानगी नसतानाच तो खुलेआम सुरु ठेवण्यात आला आहे. त्यामुळे गाव परिसराचे पर्यावरण धोक्यात आणणाऱ्या प्लांटबाबत गावचे ग्रामस्थ शत्रुघ्न उर्फ बंटी आंब्रे व अशोक आंब्रे यांनी आक्षेप घेतला होता. ग्रामस्थांच्या मते या प्लांटला ग्रामपंचायतीचा ना हरकत दाखला नसताना प्लांट व क्रशर कसे काय सुरु आहेत. त्याचबरोबर प्लांट व क्रशरसाठी प्रदूषण नियंत्रण मंडळाचा दाखला, आरोग्य विभाग व जिल्हा परिषद यांचीही परवानगी नसताना तेथे कामकाज कसे काय सुरु आहे. याचबरोबर जागा ही बिनशेती नसताना तेथे अनधिकृत १७ खोल्यांचे बांधकाम कुणाच्या परवानगीने केले, असे आक्षेप घेतले आहेत.
सर्व शासकीय बाबींची पूर्तता केल्याखेरीज प्लांट सुरु न करण्याचे आदेश बजावले आहेत. मात्र, बंदचे आदेश असतानाही वा वरील कोणत्याही बाबींची पूर्तता न करताच मागील चार दिवसांपासून येथे खडी साठविण्याचे काम कुणाच्या परवानगीने सुरु केले, अशी विचारणा ग्रामपंचायत सदस्य राजेश सागवेकर व अरविंद गमरे यांनी ग्रामपंचायतीमध्ये केली आहे. खडी घेऊन आलेल्या दोन डंपरना तेथे खडी उतरविण्यास विरोध केला. त्याचबरोबर दोन सदस्यांनी प्रसारमाध्यमांना बोलावून वस्तुस्थिती कथन केली. त्यानुसार ग्रामसेवक लहू कदम, सरपंच राकेश शिंदे यांना प्रसारमाध्यमांसमोर याची विचारणा केली. मात्र, याचे सविस्तर उत्तर देण्यास सरपंच व ग्रामसेवकांनी असमर्थता दर्शवली. ग्रामपंचायतीमध्ये झालेल्या चर्चेनुसार ग्रामसेवक व सरपंच कुणाच्या तरी दबावाखाली काम करत असून, यापूर्वी सादर केलेल्या कागदपत्रांमध्येही विसंगती असल्याचे सदस्य राजेश सागवेकर व अरविंद गमरे यांनी प्रसारमाध्यमांना सांगितले. तसेच ग्रामसेवक व सरपंच हे राहुल कन्स्ट्रक्शन या कंपनीला पाठीशी घालत असून, जोपर्यंत ग्रामसभा होत नाही, तोपर्यंत प्लांट सुरु करण्यास परवानगी न देण्याचे त्यांनी बजावले आहे.