रत्नागिरी : कोरोना प्रतिबंधक लसीकरणात महावितरणने आघाडी घेतली आहे. आतापर्यंत कोकणातील ८२.२ टक्के कर्मचाऱ्यांचे लसीकरण पूर्ण झाले आहे. येत्या पंधरवड्यात उर्वरित सर्व कर्मचाऱ्यांचे लसीकरण पूर्ण करण्याच्या सूचना देण्यात आल्या आहेत.
गेल्या दीड वर्षांपासून कोरोना प्रादुभार्वामध्ये सुरळीत वीज पुरवठ्यासाठी अहोरात्र व अविश्रांत वीज सेवा देणाऱ्या महावितरणच्या नियमित व बाह्यस्त्रोत कर्मचाऱ्यांना कोरोना प्रतिबंधक लस देण्यासाठी महावितरणच्या व्यवस्थापनाकडून विशेष प्रयत्न सुरु आहेत. महावितरणचे अध्यक्ष व व्यवस्थापकीय संचालक विजय सिंघल यांनी याबाबत सर्व जिल्हाधिकाऱ्यांशी संपर्क साधला होता. त्यामुळे आतापर्यंत ३४ जिल्ह्यांमध्ये वीज कर्मचाऱ्यांना फ्रंटलाईन वर्कर्सप्रमाणे दर्जा देण्यात आला आहे. त्याचा लसीकरणासाठी चांगला फायदा झाला.
महावितरणमध्ये कार्यरत ७५ हजार ३२३पैकी आतापर्यंत ५९ हजार ७९९ नियमित व बाह्यस्त्रोत कर्मचाऱ्यांचे लसीकरण पूर्ण झाले आहे. यामध्ये सर्वाधिक बारामती परिमंडलात ९१.२ टक्के लसीकरण झाले आहे. कोकण विभागात ८२.२ टक्के लसीकरण झाले आहे.
आतापर्यंत ४ हजार ५८ कर्मचाऱ्यांना लसीचा दुसरा डोस देण्यात आला आहे. दुसऱ्या डोससाठी निश्चित केलेल्या मुदतीनुसार लसीकरणाची सोय उपलब्ध करून देण्यात येत आहे. कोरोनाच्या नियमांचे काटेकोरपणे पालन करत ग्राहकसेवा द्यावी आणि आरोग्याची योग्य काळजी घ्यावी, असे आवाहन अध्यक्ष व व्यवस्थापकीय संचालक विजय सिंघल यांनी केले आहे.