Special attention needs to be paid to coronary heart disease | घरी उपचार घेणाऱ्या कोरोनाबाधितांवर विशेष लक्ष देणे गरजेचे 

घरी उपचार घेणाऱ्या कोरोनाबाधितांवर विशेष लक्ष देणे गरजेचे 



लोकमत न्यूज नेटवर्क
कर्जत : ‘कोरोनाची दुसरी लाट महाभयंकर आहे. आपण सर्वच कोरोना प्रादुर्भाव रोखण्यासाठी प्रयत्नशील आहोत. तरीही आपण सतर्क राहून पंधरा दिवस मेहनत घेतली तर कोरोना नक्कीच नियंत्रणात येईल. खरंतर घरी उपचार घेणाऱ्या कोरोनाबाधितांवर विशेष लक्ष देणे गरजेचे आहे. कारण ते स्वतः व त्यांचे कुटुंबीय बिनधास्तपणे फिरतात त्यामुळे कोरोनाचा फैलाव वेगात होतो. कोविडचे रुग्ण कमालीचे वाढत असल्यामुळे खासगी दवाखान्यांना कोविड सेंटरची परवानगी देताना तेथील सुविधा पाहणे गरजेचे आहे.' असे स्पष्ट प्रतिपादन खासदार श्रीरंग बारणे यांनी येथे केले.
कर्जत तहसील कार्यालयात तालुक्यातील कोरोनाची परिस्थिती काय आहे? याबद्दल कर्जत व खालापूर तालुक्यातील अधिकाऱ्यांच्या आढावा बैठकीचे आयोजन करण्यात आले होते. याप्रसंगी आमदार महेंद्र थोरवे, नगराध्यक्ष सुवर्णा जोशी, उपविभागीय अधिकारी वैशाली ठाकूर, उपविभागीय पोलीस अधिकारी अनिल घेरडीकर, कर्जतचे तहसीलदार विक्रम देशमुख, खालापूरचे तहसीलदार इरेश चपलवार उपस्थित होते. याप्रसंगी आपला जीव धोक्यात घालून एका अंध मातेच्या बालकाचे प्राण वाचविणाऱ्या मयूर शेळकेचा खासदार बारणे यांच्या हस्ते सत्कार करण्यात आला. यावेळी मयूरचे आई वडीलही उपस्थित होते.
खासदार बारणे यांनी,  'रायगड हॉस्पिटलमध्ये खासगी डॉक्टर काम करू इच्छित असतील तर त्यांची आमदारांच्या उपस्थितीत एक-दोन दिवसांत बैठक लावावी. आता १ मेपासून १८ वर्षांवरील नागरिकांना लसीकरण सुरू होणार आहे. त्यावेळी तरुणवर्गाची मोठी गर्दी होईल. त्यासाठी व्यवस्था करणे गरजेचे आहे. अन्यथा त्यांचा रोष लोकप्रतिनिधी आणि सरकारवर होईल.' असे स्पष्ट केले. आमदार थोरवे यांनी ‘कर्जत तालुक्यातील कोरोना बाधित रुग्णांना उपचाराची सुविधा मिळावी म्हणून रायगड हॉस्पिटलला कोविड रुग्णालयाचा दर्जा देऊन ते सुरू सुद्धा केले परंतु तेथे योग्य उपचार होतात की नाही? हे पाहणे गरजेचे आहे. हे हॉस्पिटल शासनाने अधिग्रहित केले तर तालुक्यातील जनतेला अधिक चांगली व मोफत सेवा तेथे उपलब्ध होऊ शकते. कर्जत उपजिल्हा रुग्णालयातसुद्धा अधिक सुविधा व वैद्यकीय अधिकारी नियुक्त करणे आवश्यक आहे तरच आपण येणाऱ्या आपत्तीवर मात करू शकू तसेच उपजिल्हा रुग्णालयाच्या परिसरात असलेल्या जुन्या इमारतीतसुद्धा कोविड रुग्णांसाठी व्यवस्था करण्यासाठी प्रयत्न करणे आवश्यक आहे.' असे सूचित करून प्रशासनाच्या कामावर नाराजी व्यक्त केली.

कोरोना परिस्थितीचा आढावा
तहसीलदार विक्रम देशमुख यांनी तालुक्यातील कोरोना परिस्थितीचा आढावा सादर केला. तहसीलदार चपलवार यांनी खालापूर तालुक्यातील कोरोनाची परिस्थिती कथन केली. खोपोलीचे मुख्याधिकारी गणेश शेट्ये यांनी 'खोपोली शहराच्या लोकसंख्ये प्रमाणे लस उपलब्ध होत नाही.' हे लक्षात आणून दिले. उपविभागीय अधिकारी वैशाली ठाकूर यांनी ‘आजच्या बैठकीत करण्यात आलेल्या सूचनांचे पालन करू.’ असा शब्द दिला. या बैठकीला गटविकास अधिकारी बालाजी पुरी, मुख्याधिकारी डॉ. पंकज पाटील, नायब तहसीलदार सुधाकर राठोड आदींसह दोन्ही तालुक्यांतील अधिकारी वर्ग उपस्थित होता.

नगराध्यक्ष जोशी यांनी, ‘लसीकरण केंद्र सुरू करण्यासाठी अनेक संस्था पुढे येत आहेत त्याचा विचार करावा. अशी सूचना मांडली. उपजिल्हा रुग्णालयाचे वैद्यकीय अधीक्षक 
डॉ. बनसोडे यांनी 'रुग्णालयात तीन वैद्यकीय अधिकाऱ्यांची पदे रिक्त आहेत. वीजपुरवठा खंडित होतो त्यावेळी उपकरणे बंद होतात त्यामुळे उपचार घेणाऱ्या कोरोनाबाधित रुग्णांना धोका होऊ शकतो. पंधरा वर्षांपूर्वी बसविलेला जनरेटर नादुरुस्त आहे. तेथे मोठ्या क्षमतेच्या जनरेटरची आवश्यकता आहे असे सांगितले.

Web Title: Special attention needs to be paid to coronary heart disease

Get Latest Marathi News , Maharashtra News and Live Marathi News Headlines from Politics, Sports, Entertainment, Business and hyperlocal news from all cities of Maharashtra.