Zilla Parishad Election : शिरुर तालुक्यातील राष्ट्रवादीमध्ये धुसफूस झाली सुरू

महानगरपालिकेमध्ये दोन्ही राष्ट्रवादी काँग्रेसने एकत्रित निवडणूक लढवल्या.

पुणे : जिल्हा परिषद आणि पंचायत समिती निवडणुकीमध्ये राष्ट्रवादी काँग्रेसने चांगलेच यश मिळवले आहे. विशेष म्हणजे या निवडणुकीमध्ये दोन्ही राष्ट्रवादी एकत्रितपणे लढल्या होत्या. खासदार डॉ. अमोल कोल्हे यांनी दिलजमाई करत एकत्रित लढण्याची घोषणा केली आहे. मात्र, निवडणुका संपताच जुळलेली मने पुन्हा दूर जाऊ लागली आहेत. शिरुर तालुक्यातील राष्ट्रवादी काँग्रेसच्या विजयी उमेदवारांना शुभेच्छा देणारी पोस्ट सध्या सोशल मीडियावर व्हायरल होत आहे. पण त्यामध्ये राष्ट्रवादी काँग्रेस शरद पवार पक्षाच्या विजयी उमेदवारांना टाळण्यात आल्याचे दिसत आहे. त्यामुळे शिरुर तालुक्यातील राष्ट्रवादीमध्ये धुसफूस झाल्याची चर्चा रंगू लागली आहे.

महानगरपालिकेमध्ये दोन्ही राष्ट्रवादी काँग्रेसने एकत्रित निवडणूक लढवल्या. त्यानंतर जिल्हा परिषद आणि पंचायत समिती निवडणुकीतही अपवाद वगळता सर्वत्र एकत्रितच निवडणूक लढवली गेली. शरद पवार गटाचे खासदार डॉ. अमोल कोल्हे यांनी जुन्नर येथे पत्रकार परिषद घेऊन एकत्रित निवडणूक लढवण्याची घोषणाही केली. त्यानंतर अंतर्गत गटबाजी कमी करण्याबरोबरच आजी-माजी आमदारांमध्येही दिलजमाई करण्यात आली. या निवडणुका एकत्रितपणे लढण्यात आल्या. सात पैकी चार गटांवर राष्ट्रवादी काँग्रेसने विजय मिळवला. तर १४ पैकी आठ जागा मिळवत पंचायत समितीवर राष्ट्रवादीचा झेंडा फडकावला. मनोमिलनामुळे हे शक्य झाले असून आता सभापती आणि उपसभापतींची निवड होणार असून तत्पूर्वीच थंड पडलेला कलह पुन्हा नव्याने समोर आला आहे. सध्या सोशल मीडियावर एक शुभेच्छाची पोस्ट व्हायरला होऊ लागली आहे. त्यामध्ये राष्ट्रवादी काँग्रेसच्या गट आणि गणातील विजयी उमेदवारांना शुभेच्छा देण्यात आल्या आहेत. पण यामध्ये सर्वच उमेदवार नाही. केवळ तीन विजयी उमेदवारांना वगळून इतर सर्व विजयी उमेदवारांचे फोटो असून शरद पवारांसह सुनेत्रा पवार, अजित पवार तसेच पक्षाच्या प्रमुख पदाधिकाऱ्यांचा फोटो वापरण्यात आला आहे.

ही पोस्ट शिरुर तालुक्यात व्हायरल होत असून यावरून पुन्हा एकदा शिरुर तालुक्यातील राष्ट्रवादीमध्ये धुसफूस झाल्याची चर्चा रंगू लागली आहे. कोणी म्हणत की कार्यकर्त्यांनी ही शुभेच्छाची पोस्ट तयार केली आहे तर कोणी म्हणत की अनावधानाने हे सर्व घडले आहे. या पोस्टबाबत उलसुलट चर्चेला ऊत आला आहे. उपमुख्यमंत्री अजित पवार यांच्या अकाली निधनानंतर पक्षात आलबेल अशी परिस्थिती निर्माण झाली आहे. त्यामुळे निवडणुकीमध्ये एकत्र आलेल्या दोन्ही राष्ट्रवादी विभक्त होणार की एकत्रित राहणार याकडे जिल्ह्याचे लक्ष लागले आहे. 

पंचायतच्या सभापतीपदासाठी भाजपची फिल्डिंग

शिरुर पंचायत समितीमध्ये पाच जागांवर भाजपने विजय मिळवला आहे. सत्ता नसली तरी राष्ट्रवादीत सुरू झालेल्या अंतर्गत धुसफूसीचा फायदा घेत सभापतीपदासाठी भाजपने फिल्डिंग लावल्याची चर्चा रंगू लागल्या आहेत. यामुळे शिरुरचे राजकीय वातावरण चांगलेच ढवळून निघत आहे.