डंपरखाली सापडून तरुणाचा मृत्यू, शिवाजी रोडवरील घटना

शिवाजी रोडवरील रामेश्वर चौकात मंगळवारी सकाळी सव्वा नऊ वाजण्याच्या सुमारास हा अपघात घडला.

पुणे : डंपरला ओलाडून पुढे जात असताना अचानक नो एंट्रीमध्ये विरुद्ध बाजूने दुचाकीस्वार आल्याने डंपरचे चाक डोक्यावरुन गेल्याने एका मोटारसायकलस्चाराचा जागीच मृत्यू झाला. शिवाजी रोडवरील रामेश्वर चौकात मंगळवारी सकाळी सव्वा नऊ वाजण्याच्या सुमारास हा अपघात घडला.

शुभम दादाभाऊ डोके (वय २१, रा. मगरपट्टा) असे मृत्यु पावलेल्या तरुणाचे नाव आहे. याप्रकरणी फरासखाना पोलिसांनी डंपरचालक कलमदेव कैलाश महतो (वय २८, रा. मुंढवा) याला अटक केली आहे. स्कुटरचालकावर गुन्हा दाखल करण्यात आला आहे.

पोलिसांनी दिलेल्या माहितीनुसार, शुभम डोके हा शिक्षण घेत आहे. तो दगडुशेठ हलवाई गणपतीचे दर्शन घेऊन शिवाजी रोडने मोटारसायकलवरुन स्वारगेटच्या दिशेने जात होता. रामेश्वर चौकाजवळ त्याने उजव्या बाजूने डंपरला ओलांडून पुढे जात असताना मंडईकडून एक स्कूटरचालकाने अचानक वाहतूकीच्या विरुद्ध दिशेने गाडी वळवली. तो डोके यांच्यासमोर आला. त्यामुळे डोके बिचकले. 

त्याचा तोल जाऊन डाव्या बाजूने जाणार्या डंपरच्या उजव्या चाकाच्या बाजूला गाडीसह पडला. डंपरचे मागचे चाक त्याच्या डोक्यावर गेल्याने त्याचा जागीच मृत्यू झाला. पोलीस उपनिरीक्षक जयसिंग दाढे तपास करीत आहेत. नो एंट्रीतून अनेक जण बेधडकपणे जात असतात, परंतु एकाच्या चुकीमुळे तरुणाला आपला जीव गमविण्याची वेळ आज आली.