पिंपरी : अल्पवयीन मुले चालवित असलेल्या दुचाकीचा तरुणाला धक्का लागला. त्यामुळे तरुणाने अल्पवयीन मुलाच्या कानशिलात लगावली. या रागातून अल्पवयीन मुलाने दगड मारून जखमी करून तरुणाला मारहाण केली. यात तरुणाचा मृत्यू झाला. जाधववाडी, चिखली येथे शुक्रवारी (दि. ३१) सायंकाळी पावणे सातच्या सुमारास ही घटना घडली. अल्पवयीन मुले चालवित असलेल्या दुचाकीमुळे या गुन्ह्याचा छडा लागला.
सुनील शिवाजी सगर (वय ३५, रा. जाधववाडी, चिखली), असे खून झालेल्या तरुणाचे नाव आहे. याबाबत त्यांच्या २५ वर्षीय पत्नीने शनिवारी (दि. १) चिखली पोलीस ठाण्यात फिर्याद दिली. त्यानुसार एका १७ वर्षीय व एका १४ वर्षीय अशा दोन अल्पवयीन मुलांच्या विरोधात पोलिसांनी गुन्हा दाखल केला.
पोलिसांनी दिलेल्या माहितीनुसार, शुक्रवारी सायंकाळी सुनील सगर हे कामावरून घरी येत होते. ते जाधववाडी, चिखली येथे आले असता आरोपींनी अज्ञात कारणासाठी त्यांना मारहाण केली. यात त्यांचा मृत्यू झाला. याप्रकरणी खुनाचा गुन्हा दाखल करण्यात आला. याप्रकरणाचा चिखली पोलिसांनी तपास सुरू केला. अल्पवयीन मुलांनी गुन्हा करताना वापरलेल्या दुचाकीबाबत माहिती मिळाली. त्यानुसार पोलिसांनी गाडीमालकाकडे चौकशी केली. शुक्रवारी (दि. ३१) सायंकाळी दुचाकी कोण चालवित होता, याबाबत पोलिसांनी गाडीमालकाकडे विचारणा केली. गाडीमालकाच्या मुलाच्या दोन मित्रांनी गाडीची मागणी केली. मित्राला भेटायला चिखली येथे जायचे आहे, असे त्यांनी सांगितले. त्यामुळे गाडीमालकाच्या मुलाने त्याच्या मित्रांना दुचाकी दिली. त्यानुसार पोलीस गाडीमालकाच्या मुलाच्या मित्रांच्या घरी गेले. ते दोघेही घरी मिळून आले.
दुकानातून बाहेर काढून मारहाण
दोन्ही अल्पवयीन मुले दुचाकी घेऊन मित्राकडे जात होते. त्यावेळी जाधववाडी, चिखली येथे सुनील सगर यांना दुचाकीचा धक्का लागला. त्यामुळे सगर यांनी दुचाकीवरील अल्पवयीन मुलांपैकी एकाच्या कानशिलात लगावली. याचा राग आल्याने अल्पवयीन मुलांनी सुनील यांना मारहाण केली. त्यामुळे सुनील हे त्यांच्या तावडीतून सुटून पळत-पळत एका किराणा दुकानात घुसले. अल्पवयीन मुलांनी दुचाकीवरून त्यांचा पाठलाग केला. त्यानंतर १७ वर्षीय अल्पवयीन मुलाने सुनील यांना दुकानाबाहेर ओढून काढले. दोन्ही अल्पवयीन मुलांनी सुनील यांना हाताबुक्क्यांनी मारहाण केली.
डोक्यात घातला दगड
दुकानाबाहेर सुनील यांना मारहाण करताना १७ वर्षीय अल्पवयीन मुलाने तेथे पडलेला दगड उचलला. तो दगड दोन ते तीन वेळा डोक्यात मारल्याने सुनील हे गंभीर जखमी झाले. त्यामुळे सुनील हे खाली पडले. त्यानंतर त्यांच्या डोक्यातून रक्त येऊ लागले. त्यावेळी तेथे लोकांची गर्दी झाल्याने अल्पवयीन मुले घाबरून गाडी घेऊन तेथून निघून गेले. त्यानंतर त्यांनी मित्राला दुचाकी परत केली. पोलिसांनी सीसीटीव्ही फुटेजची पाहणी केली.