लोकमत न्यूज नेटवर्क
पुणे : जिल्ह्यात जवळपास ९० हजार डॉक्टर व आरोग्य कर्मचाऱ्यांनी कोरोना लसीसाठी नोंदणी केली आहे. पण नोंदणी करूनही काहींच्या मनात लस घ्यायची की नाही याबाबत संभ्रम आहे. लसीच्या मानवी चाचण्या कमी प्रमाणात झाल्या आहेत. त्यामुळे त्याची सुरक्षितता आणि परिणामांबाबत माहिती नाही. शिवाय ९-१० महिन्यांपासून कोरोना रुग्णांच्या सेवेत असल्याने भीती उरलेली नाही. त्यामुळे लसीबाबत फारशी उत्सुकता राहिली नसल्याच्या प्रतिक्रिया आरोग्य कर्मचाऱ्यांकडून ऐकू येत आहेत.
लसीकरणासाठी जिल्ह्यात एकूण १ लाख १० हजार आरोग्य कर्मचाऱ्यांपैकी डिसेंबरअखेर सुमारे ८९ हजार जणांनी नोंदणी केली आहे. हे प्रमाण ८० टक्क्यांहून अधिक आहे. केंद्र सरकारने नुकतीच दोन लसींच्या आपत्कालीन वापरासाठी मान्यता दिली आहे. त्यामुळे या कर्मचाऱ्यांच्या पहिल्या टप्यातील लसीकरणाला लवकरच आरंभ होईल. याबाबत अनेकांना उत्सुकता असली तरी काही जणांमध्ये संभ्रम आहे.
काही रुग्णालयातील डॉक्टर व कर्मचाऱ्यांशी याबाबत संवाद साधण्यात आला. “नाव नोंदविले असले तरी लस घेण्याबाबत ठरविले नाही. सुरूवातीपासून मी कोरोना रुग्णांची सेवा करत आहे. अद्याप एकदाही ‘पॉझिटिव्ह’ आले नाही. आता पूर्वीप्रमाणे लसीची उत्सुकता नाही. त्याची परिणामकारकता किती दिवस राहील, हेही माहिती नाही,” असे एका परिचारिकेने सांगितले. काही डॉक्टरांनी लसीसाठी नोंदणीच केलेली नाही. यापैकी एकांनी स्पष्टपणे सांगितले की, आता आम्ही कोरोनासोबत जगायला शिकलो आहोत. योग्य काळजी घेतली तर लसीची गरज नाही.
चौकट
सुरक्षिततेबाबत जाहीर करावे
“लसीबाबत डॉक्टर, कर्मचाऱ्यात उत्सुकता आहे. काही जणांच्या मनात भीतीही आहे. लसीची सुरक्षितता, त्याचे परिणाम, लसीचा खरच उपयोग होईल का, याबाबत काही लोक संभ्रमात आहेत. ‘केंद्र सरकारने अधिकृतपणे ही लस सुरक्षित असल्याचे जाहीर करावे. तसेच लसीचे काही विपरीत परिणाम झाल्यास ही शासनाची जबाबदारी असेल,’ याची ग्वाही द्यावी, असी काहींची मागणी आहे. त्यानंतच वैद्यकीय कर्मचाऱ्यांसह नागरिकांच्या मनातील भीतीही नाहीशी होईल. लस घेणे हे राष्ट्रीय कर्तव्य असल्याचे मानून बहुतेक सदस्यांची नोंदणी केली आहे.”
- डॉ. अविनाश भोंडवे, अध्यक्ष, इंडियन मेडिकल असोसिएशन, महाराष्ट्र
चौकट
वैद्यकीय कर्मचारी संभ्रमात
मागील नऊ-दहा महिन्यांपासून कोरोना रुग्णांची सेवा करत आहोत. काही जणांना कोरोना होऊनही गेला. अनेकांना त्याची जाणीवही झाली नाही. त्यामुळे मनात कोरोनाची भीती नाही. परिणामी लसीबाबत पूर्वीसारखी उत्सुकता नाही. लसीचे काही परिणाम होत असल्याचे बातम्या येत आहेत. प्रतिकारशक्ती किती दिवस टिकणार, हेही माहिती नाही. त्यामुळे लस घ्यायची की नाही, याबाबत संभ्रम असल्याचे काहींचे म्हणणे आले. एका परिचारिकेने लसीबाबत उत्सुकता नसली तरी लस घेणार असल्याचे सांगत इतरांनाही आवाहन केले.
चौकट
लस घेणार नाही
एका डॉक्टरांनी लस घेणार नसल्याचे स्पष्ट सांगितले. मास्क आणि हातांची स्वच्छता व अन्य काळजी घेत असल्याने लसीची गरज वाटत नाही. कोरोनातून बरे होणाऱ्यांची संख्या मोठी असल्याने तो जीवावर बेतणारा नाही. ज्येष्ठ नागरीक, अन्य आजार असलेल्यांना धोका आहे. त्यामुळे मला लस घेण्याची गरज वाटत नाही, असे एका डॉक्टरांनी स्पष्ट केले.
चौकट
लसीसाठी झालेली नोंदणी (डिसेंबरअखेर)
एकूण आरोग्य कर्मचारी - १,१०,४३४
शासकीय - २६,२०९
खासगी - ८४,२२५
एकूण नोंदणी - ८९,०७४
शासकीय - २२,२५५
खासगी - ६६,८१९
------------------------