भरधाव वाहनाची वाहतुक सुरक्षारक्षकाला धडक

लोकमत न्यूज नेटवर्क

लोणी काळभोर : भरधाव वेगात आलेल्या वाहनांने वाहतूक नियमन करत असलेल्या सुरक्षारक्षकाला धडक दिल्याने झालेल्या अपघातात त्याचा जागीच मृत्यू झाला. ही घटना कुंजीरवाडी (ता. हवेली) गावच्या हद्दीत थेऊर फाटा येथे रविवारी पहाटे घडली.

दत्ताराम गोविंद अडागळे (वय ६३, रा. उरुळी कांचन, दातार कॉलनी, ता. हवेली) असे अपघातात मृत्युमुखी पडले आहेत. त्यांचे पुतणे अविनाश आत्माराम अडागळे (वय ३४, रा. उरूळी कांचन, दातार कॉलनी, ता. हवेली) यांनी दिलेल्या फिर्यादीवरून वाहनचालकावर गुन्हा दाखल करण्यात आला आहे. वरिष्ठ पोलीस निरीक्षक सुरज बंडगर यांनी दिलेल्या माहितीनुसार, अडागळे हे गेल्या एक आठवड्यापासून कालिका सिक्युरीटीमध्ये काम करत होते. थेऊर फाटा ते लोणी कंद मार्ग दुरूस्तीचे काम चालू असल्याने त्या मार्गावरून मोठी वाहने जावू न देणे या कामावर कालिका सिक्युरीटीने त्यांना नेेेेमले होते. आणखी एकासह त्यांना रात्रपाळीसाठी नेमले होते. रविवारी राम बेनी सवारे (सध्या रा. थेऊर, मूळ रा. धौरहरा बांगर, तालुका बांधा, जि. चित्रकुट, उत्तर प्रदेश) यांच्या सोबत थेऊर फाटा येथे वाहतुकीचे नियमन करत असताना पहाटे ४ च्या सुमारास अडागळे हे सोलापूर बाजूकडून पुणे बाजुकडे जाणारे महामार्गावरून जड वाहने थेऊर बाजुकडे न येता ती सरळ जावीत यासाठी थांबले होते. त्यावेळी सोलापूर बाजूकडून पुणेकडे जाणाऱ्या भरधाव वाहनाने धडक दिली. यात त्यांचा जागीच मृत्यू झाला. त्यानंतर लोणी काळभोर पोलीसांनी अपघात झाले ठिकाणी पाहणी केली असता तेथे त्यांना अपघात केलेले गाडीचा बंपर तुटलेला मिळून आला आहे.