शगुप्ता शेख
पुणे : पुण्यातील उरुळी कांचन ग्रामपंचायत हद्दीत शनिवारी सायंकाळी सव्वा सातच्या सुमारास भीषण अपघात घडला आहे. संपूर्ण रस्त्यावर फटाक्यांच्या धुराने दोन दुचाकींची समोरासमोर धडक होऊन ४ जण जखमी झाले आहेत. चक्रधर संतोष कांचन, क्षितिज राहुल जाधव (वय- 18, रा. दोघेही उरुळी कांचन), सिद्धांत नवनाथ सातव (वय- 20) व प्रतीक संतोष साठे (वय- 20) असे अपघातात जखमी झालेल्या चौघांची नावे आहेत.
मिळालेल्या माहितीनुसार, उरुळी कांचन ग्रामपंचायत हद्दीत शनिवारी सायंकाळी दिवाळीत काही मुले रस्त्यावर फटाके वाजवत होते. फटाक्यांमुळे संपूर्ण रस्त्यावर धूर झाल्याने दोन दुचाकींची समोरासमोर जोरदार धडक बसली. या अपघातात चौघेजण जखमी झाले आहेत. तर एकजण गंभीर जखमी झाला असून चौघांवर वेगवेगळ्या खाजगी रुग्णालयात उपचार सुरू आहेत. रस्ता पूर्णपणे हा धुरमय झाला होता. त्यातून समोर काही दिसत नव्हते त्यातून हा अपघात झाला. एका दुकानाचे उद्घाटन सुरू होते त्यावेळी घटना घडली आहे. एका व्यक्तीने लांबून फटाक्यांचा व्हिडीओ काढत असताना अपघात व्हिडीओ निघाला आहे. मात्र आता पोलिस कोणावर कारवाई करणार हे पाहणं महत्वाचं ठरणार आहे.