Maharashtra Local Body Election 2025: पुणे जिल्ह्यात दुसऱ्या टप्प्यात एकूण २०.२२ टक्के मतदान; मतदानात १२ टक्क्याने वाढ

पुणे जिल्ह्यात सकाळी ७.३० ते ११.३० यावेळेत जिल्ह्यातील १२ नगरपरिषद ३ नगरपंचायत मिळून २०.२२ टक्के मतदान झाले आहे

पुणे: राज्यातील २६४ नगरपालिका आणि नगरपंचायतीच्या निवडणुकीसाठी आज, मंगळवारी मतदान होत असून, त्यासाठी संपूर्ण मतदान यंत्रणा सज्ज झाली आहे. सकाळी ७:३० वाजता मतदानास सुरुवात होईल आणि सांयकाळी ५:३० पर्यंत मतदानाची वेळ असेल. या निवडणुकीचा निकाल उद्या लागणार होता. मात्र राज्यातील सर्व नगरपालिका व नगरपंचायत निवडणुकीचा निकाल २१ डिसेंबर रोजी एकत्र जाहीर करण्याचा मुंबई उच्च न्यायालयाच्या नागपूर खंडपीठाने आदेश दिला आहे. २० डिसेंबरच्या निवडणुकीपर्यंत आचारसंहिता लागू राहील आणि कोणालाही एक्झिट पोल प्रसिद्ध करता येणार नसल्याचे असेही न्यायालयाने स्पष्ट केले.

पुणे जिल्ह्यात सकाळी 7.30 ते 9.30 या दोन तासात जिल्ह्यातील 12 नगरपरिषद ३ नगरपंचायत मध्ये मिळून 8.37% मतदान झाले होते. आता दुसऱ्या टप्प्यात ११.३० वाजेपर्यंत २०.२२ टक्के मतदान झाले आहे.  तब्बल आठ ते दहा वर्षानंतर स्थानिक स्वराज्य संस्थांच्या निवडणुका पार पडत असल्याने उमेदवार, कार्यकर्ते आणि मतदारांची मतदानाबाबतची उत्सुकता शिगेला पोहोचली आहे. निवडणुका जिंकण्यासाठी राजकीय पक्षांनीही कंबर कसली आहे. निमशहरी भागातील मतदार आपला कौल कुणाच्या बाजूने मतदान यंत्रात बंद करतात, याकडे सर्वांचे लक्ष लागले आहे.

नगरपरिषद मतदान टक्केवारी 

दौंड- १३.२१ , लोणावळा- २२.२३, चाकण-२३.६० , शिरूर-१३.२३ , इंदापूर-२४.९५ , जेजुरी-२१.०३, आळंदी-२४.५४, राजगुरूनगर-१७.२४, सासवड- २४.३०, तळेगाव दाभाडे- १६.२८, जुन्नर- १७.५९ , भोर- २१.७५ 

नगरपंचायत मतदान टक्केवारी 

मंचर - २७.८३, माळेगाव - २४.१२, वडगाव मावळ - २८.३३