रेल्वेत दरवाजात उभे राहून प्रवास करणाऱ्यांना दणका; समज देऊनही न ऐकल्यास थेट कारावास

रेल्वे कायदा १९८९ च्या कलम १५६ अंतर्गत रेल्वे गाडीच्या छतावर, इंजिनवर, पायऱ्यांवर किंवा दरवाजांवर प्रवास करणे सक्त मनाई आहे

पुणे : रेल्वेतून प्रवास करताना जागा न मिळाल्याने काही प्रवासी दरवाजात उभे राहून प्रवास करतात. अशा लटकत अथवा पायऱ्यांवर बसून प्रवास करणाऱ्यांवर पुणेरेल्वे विभागाकडून कारवाईची मोहीम राबविण्यात आली. दरम्यान, १०५ जणांवर कारवाई करून त्यांच्यावर दंडात्मक कारवाई करण्यात आली.

मुंबईमध्ये काही दिवसांपूर्वी लोकलमधून लटकत प्रवास करीत असताना खाली पडून काही प्रवाशांचा मृत्यू झाला होता. या पार्श्वभूमीवर पुणे विभागाने धोकादायक प्रवास रोखण्यासाठी ११ ते २५ जूनदरम्यान एक विशेष तपासणी मोहीम हाती घेतली होती. त्यानुसार रेल्वे सुरक्षा दलाने (आरपीएफ) लोकल आणि एक्सप्रेस गाड्यांमध्ये दरवाजात उभे राहून अथवा लटकत प्रवास करणाऱ्यांवर कारवाई केली. या कारवाईत १०५ प्रवासी धोकादायक पद्धतीने प्रवास करताना आढळून आले.

तीन महिने कारवास 

 रेल्वे कायदा १९८९ च्या कलम १५६ अंतर्गत रेल्वे गाडीच्या छतावर, इंजिनवर, पायऱ्यांवर किंवा दरवाजांवर प्रवास करणे सक्त मनाई आहे. रेल्वे कर्मचाऱ्यांनी समज देऊनही जर एखादी व्यक्ती अशा प्रतिबंधित ठिकाणी प्रवास करीत राहिली, तर त्या व्यक्तींवर कारवाई करून त्यास ५०० रुपयांच्या दंडाची अथवा तीन महिन्यांपर्यंत कारावासाची शिक्षा करण्याची तरतूद कायद्यात आहे.

पुणे रेल्वे विभाग प्रवाशांच्या सुरक्षेची कटिबद्धता आहे. पायऱ्यांवर प्रवास करणे ही अत्यंत धोकादायक सवय आहे. यावर अंकुश ठेवण्यासाठी भविष्यातही अशा मोहिमा सातत्याने राबविण्यात येतील. नागरिकांनी दरवाजात बसून अथवा लटकत प्रवास करू नये. सुरक्षित प्रवासाच्या नियमांचे पालन करावे. - हेमंतकुमार बेहरा, जनसंपर्क अधिकारी, पुणे रेल्वे विभाग