तरुणाची गळफास घेऊन आत्महत्या

वाघोलीत अवैध दारूविक्रेता तरुणाने लिंबाच्या झाडाला दोरीच्या साहाय्याने गळफास घेऊन आत्महत्या केल्याची घटना वाघोली बाजारतळ शेजारी झोपडपट्टीजवळ सोमवारी (दि. २२) सकाळी उघडकीस आली.

वाघोली : वाघोलीत अवैध दारूविक्रेता तरुणाने लिंबाच्या झाडाला दोरीच्या साहाय्याने गळफास घेऊन आत्महत्या केल्याची घटना वाघोली बाजारतळ शेजारी झोपडपट्टीजवळ सोमवारी (दि. २२) सकाळी उघडकीस आली. आत्महत्येपूर्वी तरुणाने चिठ्ठीमध्ये पैशासाठी पार्टनर त्रास देत असल्याने आत्महत्या करीत असल्याचे नमूद केले आहे. 

गणेश शेळके (वय २१, रा. बाजारतळ गायरान झोपडपट्टी) असे आत्महत्या केलेल्या दारूविक्रेत्या तरुणाचे नाव आहे. याबाबत मिळालेल्या माहितीनुसार गणेश शेळके बाजारतळ गायरान झोपडपट्टीमध्ये काही पार्टनरच्या मदतीने अवैध दारूविक्री करीत होता. शेळके याने घर व अवैध दारूविक्रीच्या ठिकाणाजवळ असणाऱ्या लिंबाच्या झाडाला दोरीच्या साहाय्याने गळफास घेऊन आत्महत्या केल्याचे सोमवारी सकाळी उघडकीस आले. यानंतर परिसरात एकच खळबळ उडाली. पोलीस घटनास्थळी दाखल झाल्यानंतर मृतदेह विच्छेदनासाठी हलविण्यात आला. याप्रकरणी लोणीकंद पोलीस ठाण्यात गुन्हा दाखल करण्यात आला आहे.

आत्महत्येपूर्वी शेळके याने पार्टनरमुळे आत्महत्या करीत असल्याचे एका चिठ्ठीत लिहिले आहे. दारूधंद्याला पार्टनर होता, त्याचबरोबर धंदा चालू करण्यासाठी दोन हजार रुपयांची मागणी केली व गाडी जप्त करून पैशाची मागणी करीत असल्याने फाशी घेत असल्याचे चिठ्ठीत लिहिले आहे.