भयंकर! आईचा खून करताना पाहिल्यामुळे नराधम बापाने सात वर्षांच्या मुलालाही संपविले 

आरोपी सचिन सोनवणे याने पत्नीला गळफास दिल्याचे मुलगी वैष्णवी आणि मुलगा ओम याने पाहिले होते.

पाटस : पाटस ( ता. दौंड ) येथे आईचा खून करतांना मुलाने पाहिल्याने बापानेच पोटच्या मुलाला गळफास  देऊन खून केला असल्याची माहिती पोलीस निरीक्षक भाऊसाहेब पाटील यांनी दिली. ही घटना मंगळवारी(दि.२७) पहाटेच्या सुमारास घडली त्यामुळे परिसरात खळबळ उडाली आहे.

पोलिसांनी दिलेल्या माहितीनुसार लीना सोनवणे (वय३५), ओम सोनवणे (वय ७, दोघेही रा.स्वराज व्हॅली अपार्टमेंट , पाटस , ता. दौंड ) असे खून झालेल्या मायलेकांचे नाव आहे.

या प्रकरणी मयत लिनाचा पती सचिन सोनवणे याला पोलिसांनी ताब्यात घेतले आहे. सचिन सोनवणे याने  प्रेयसीच्या मदतीने हे कृत्य केले असल्याचे पोलिसांनी सांगितले.

दरम्यान, पोलीस प्रेयसीचा शोध घेत आहेत. लीना सोनवणे यांच्यासह त्यांची मुलगी वैष्णवी (वय १०),  मुलगा ओम हे घरी होते. लीना यांनी स्वयंपाक घराच्या छताच्या पंख्याला तर ओम याने त्याच्या बेडरुममध्ये छताच्या पंख्याला गळफास घेतल्याचे सकाळी वैष्णवी हिला दिसले. त्यानंतर घडलेली घटना वैष्णवीने तिच्या नातेवाईकांना कळविली.

त्यानुसार नातेवाईक घटनास्थळी दाखल झाले. याप्रकरणी भाऊसाहेब शेलार (रा. केडगाव, ता.  दौंड ) यांनी पोलिसात फिर्याद दिली. मात्र, नातेवाईकांनी ही आत्महत्या नसून घातपात असल्याचा संशय व्यक्त केला होता. पोलिसांनी अवघ्या सहा तासात घटनेचा छडा लागला.

सचिन सोनवणे याने पत्नीला गळफास दिल्याचे मुलगी वैष्णवी आणि मुलगा ओम याने पाहिले होते. ओम हा प्रकार सर्वांना सांगेल म्हणून त्याला ही बापाने गळफास दिला. तर वैष्णवी हा प्रकार कुणाला सांगणार नाही याची खात्री बापाला झाल्याने ती या मृत्यू कांडातून वाचली. रात्री उशिरापर्यंत याबाबत गुन्हा नोंदविण्याचे काम सुरु होते. घटनास्थळी उपविभागीय पोलीस अधिकारी राहुल धस, यवतचे पोलीस निरिक्षक भाऊसाहेब पाटील, पोलीस उपनिरीक्षक सचिन नागरगोजे, रामभाऊ घाडगे, सागर चव्हाण, प्रदीप काळे, विजय भापकर यांनी भेट दिली.