शरद पवारांची प्रकृती पुन्हा बिघडली; पुण्यातील रूबी रुग्णालयात उपचारासाठी केले दाखल

काही दिवसांपूर्वी खोकल्याच्या त्रासामुळे शरद पवारांना बारामतीहून पुण्यात उपचारासाठी आणले होते. रूबी रुग्णालयात त्यांच्यावर उपचार करून ५ दिवसांनी डिस्चार्ज देण्यात आला होता

पुणे - काही दिवसांपूर्वीच रुग्णालयातून परतलेले ज्येष्ठ नेते शरद पवार यांची प्रकृती पुन्हा बिघडली आहे. शरद पवारांना पुण्यातील रूबी रुग्णालयात पुढील उपचारासाठी दाखल करण्यात आले आहे. अशक्तपणामुळे त्यांना डॉक्टरांच्या देखरेखीत ठेवण्यात आले आहे.

'लोकमत महाराष्ट्रीयन ऑफ द इयर' कोण?... क्लिक करून आपलं मत नोंदवा!

माहितीनुसार, राष्ट्रवादी काँग्रेसचे अध्यक्ष शरद पवार यांना सकाळपासून अशक्तपणा जाणवत होता. शरीरातील पाण्याची पातळी कमी झाल्याने त्यांना हायड्रेशनचा त्रास जाणवला. त्यामुळे त्यांना रूबी रुग्णालयात उपचारासाठी दाखल केले. डॉक्टरांचे एक पथक त्यांच्या तब्येतीवर लक्ष ठेवून आहेत. सुप्रिया सुळे यांनी सोशल मीडियावर ट्विट करत पवारांच्या तब्येतीची माहिती दिली. आम्ही बाबांना पुढील चाचण्या आणि हायड्रेशनसाठी पुण्यातील रुबी हॉलमध्ये दाखल करत आहोत असं त्यांनी सांगितले आहे. 

काही दिवसांपूर्वी खोकल्याच्या त्रासामुळे शरद पवारांना बारामतीहून पुण्यात उपचारासाठी आणले होते. रूबी रुग्णालयात त्यांच्यावर उपचार करून ५ दिवसांनी डिस्चार्ज देण्यात आला होता. पुढील काही दिवस घरी विश्रांती घेण्याचा सल्ला त्यांना देण्यात आला. शिवाय नियमित औषधोपचार सुरू ठेवण्याच्या सूचनाही डॉक्टरांनी दिल्या होत्या. परंतु आता पुन्हा शरद पवारांच्या प्रकृतीत बिघाड झाला आहे. 

अजित पवारांच्या निधनानंतर शरद पवार तातडीने मुंबईहून बारामतीला गेले होते. तेव्हापासून पुढील १०-१२ दिवस शरद पवारांची मोठ्या प्रमाणात धावपळ झाली. त्यात थकवा आणि इतर त्रास त्यांना जाणवू लागला होता. खोकल्यामुळे छातीत कफ झाले होते म्हणून त्यांच्यावर रुग्णालयात उपचार करण्यात आले होते. त्यानंतर पुन्हा ते बारामतीला परतले. मात्र आज सकाळपासून शरद पवारांना अशक्तपणा जाणवत असल्याने कुटुंबाने त्यांना उपचारासाठी रुग्णालयात दाखल केले आहे.