पुणे :रेल्वे स्टेशन येथे ‘आयआरसीटीसी’च्या नावाने सुरू असलेल्या स्टॉलमध्ये खराब पदार्थांची विक्री केली जात असल्याचा प्रकार समोर आला आहे. प्रवाशांनी स्टॉलचालकास जाब विचारल्यानंतर त्याने प्रवाशांसोबत वाद घातला. रेल्वे स्टेशनवर खराब पदार्थांची विक्री होत असताना रेल्वे प्रशासन करतेय काय? असा प्रश्न उपस्थित केला जात आहे.
पुणे रेल्वे स्टेशन येथील आयआरसीटीसी कॉफीशल फास्ट फूड सर्व्हिस सेंटर येथून एका प्रवाशाने बुधवारी वडापाव खरेदी केला; पण तो वडापाव खूपच खराब झाला होता. त्याचा वास येत असल्याचे प्रवाशांच्या लक्षात आले. त्यांनी स्टॉलचालकास विचारणा केली; पण तो वडापाव खराब झाल्याचे मान्यच करत नव्हता.
त्यावेळी पुणे ग्रामीण रेल्वे प्रवासी ग्रुपच्या सदस्यांनी त्याला जाब विचारत त्याचा व्हिडीओ काढण्यास सुरुवात केली. रेल्वे स्टेशनवर खराब पदार्थ विक्री केली जात असून, हा प्रवाशांच्या जीवाशी एकप्रकारे खेळच आहे. रेल्वे प्रशासनाने कडक कारवाई करावी, अशी मागणी प्रवाशांकडून केली जात आहे.