पुणे: कल्याणीनगर अपघात प्रकरणात कार चालकाला धमकावून बंगल्यात डांबून ठेवल्याप्रकरणी आरोपी सुरेंद्रकुमार अग्रवाल आणि विशाल अग्रवाल यांना प्रत्येकी ५० हजार रुपयांच्या वैयक्तिक जातमुचलक्यावर प्रथमवर्गन्यायदंडाधिकारी एन. एस. बारी यांनी अटी शर्तींवर् जामीन मंजूर केला.
आठवड्यातून दोन वेळा पोलिस ठाण्यात हजेरी लावावी, जिल्ह्याची हद्द सोडून बाहेर जाऊ नये, तसेच पासपोर्ट पोलिसांकडे जमा करावा आणि साक्षीदारांवर दबाव आणू नये, आदी अटी-शर्तींवर न्यायालयाने अग्रवाल बापलेकाला जामीन मंजूर केला. त्यामुळे सुरेंद्रकुमार अग्रवाल कारागृहाबाहेर येणार असला तरी रक्ताचे नमुने बदलून पुरावे नष्ट केल्याप्रकरणी विशाल अग्रवाल मुक्काम येरवडा कारागृहातच असणार आहे.
'पोर्शे’ कार भरधाव चालवून तरुण-तरुणीच्या मृत्यूस कारणीभूत ठरलेल्या अल्पवयीन मुलाचा गुन्हा स्वत:च्या अंगावर घेण्यासाठी चालकाला बंगल्यात डांबून ठेवत त्याचा मोबाइल फोन काढला. तसेच त्याला धमकावल्याप्रकरणी सुरेंद्रकुमार ब्रह्मदत्ता अग्रवाल (वय ७७) आणि विशाल सुरेंद्रकुमार अग्रवाल (वय ५०, दोघे रा. बंगला क्रमांक एक, ब्रह्मा सनसिटी, वडगाव शेरी) यांना अटक करण्यात आली होती. या गुन्ह्यात न्यायालयीन कोठडी मिळाल्यावर दोघांनी जामिनासाठी अर्ज केला होता. सरकार पक्षातर्फे सहायक सरकारी वकील योगेश कदम आणि बचाव पक्षातर्फे अँड प्रशांत पाटील यांनी बाजू मांडली.