पुणे - राज्यभरात सध्या पावसाचा धुमाकूळ सुरू आहे. जवळपास संपूर्ण महाराष्ट्रालाच पावसाने झोडपले आहे. त्यामुळे गरज असेल तरच घराबाहेर पडा असं आवाहन प्रशासनाकडून केलं जातय. तर दुसरीकडे मात्र वर्षाविहारासाठी तरुणाई मोठ्या संख्येने डोंगरदऱ्यात जाताना दिसतेय. पुण्याजवळ असणाऱ्या प्रसिद्ध सिंहगड किल्ल्यावर देखील पर्यटकांचा ओघ पाहायला मिळतोय. मात्र पर्यटन करताना काळजी घेणही तितकंच गरजेचं असतं.
पुरेशी खबरदारी घेतली नाही तर अपघात अटळ असतो. आणि अशीच काहीशी घटना सिंहगड किल्ल्यावर घडली. हैदराबाद येथून मित्रांसह पर्यटनासाठी आलेला एक २ ४ वर्षांचा तरुण बुधवारी दुपारपासून अचानक बेपत्ता झाला. सिंहगड किल्ल्यावरील तानाजी कडा इथून तो खोल दरीत कोसळल्याची माहिती आहे. मात्र २ ४ तासानंतरही या तरुणाचा शोध लागलेला नाही.
नेमकं काय घडलं ?अधिकच्या माहितीनुसार, गौतम गायकवाड या तरुणाचं नाव असून तो मूळचा सातारा जिल्ह्यातील फलटणचा रहिवाशी आहे. गौतम सध्या हैदराबाद मध्ये वास्तव्यास असतो. बुधवारी ( दि. २ ० ) दुपारी तो मित्रांसह सिंहगड किल्ल्यावर पर्यटनासाठी आला होता. सायंकाळी साडेचार वाजण्याच्या सुमारास हे सर्व मित्र किल्ल्यावरील तानाजी कडया जवळ पोहोचले. यावेळी गौतम लघुशंका करून येतो म्हणून मित्रांपासून काहीसा बाजूला गेला. आणि इथेच घात झाला, बराच वेळ झाला.. गौतम परत आलाच नाही. त्यानंतर मित्रांनी त्याचा शोध घेण्यास सुरुवात केली. मात्र गडावरील तानाजी कडा परिसरात तो कुठेच आढळला नाही. मात्र जवळच त्याची चप्पल दिसली. परंतु गौतमचा ठावठिकाणा काही लागला नाही. अखेरीस गौतमच्या मित्रांनी रात्री आठ वाजण्याच्या सुमारास पोलिसांच्या नियंत्रण कशाला फोन करून गौतम बेपत्ता झाल्याची माहिती दिली.या घटनेची माहिती मिळताच हवेली पोलीस स्टेशनचे पोलीस अधिकारी तातडीने घटनास्थळी दाखल झाले. पोलिसांनी हवेली आपत्ती व्यवस्थापनाशी संपर्क साधत त्यांना देखील गौतम बेपत्ता झाल्याची माहिती दिली. आणि त्यानंतर शोधकार्य सुरू झालं. घनदाट धुक्यामुळे जमिनीचा अंदाज न आल्यामुळे गौतम थेट तानाजी कड्यावरून खाली कोसळल्याच समोर आलं. दरम्यान, सिंहगड परिसरात मागील काही दिवसांपासून मुसळधार पाऊस सुरू आहे. याशिवाय वाऱ्याचा वेग ही प्रचंड आहे.. घनदाट धुकं पसरलं असल्याने शोध कार्यात अडथळे येत होते.अखेरीस लघुशंकेसाठी गेलेला गौतम धुक्यामुळे जमिनीचा अंदाज न आल्याने खोल दरीत कोसळला असल्याचं समजलं.समोर आलेल्या माहितीनुसार, पोलिसांनी रात्री ११ वाजता अंधारामुळे शोधकार्य थांबवण्यात आलं. त्यानंतर आज सकाळी ६ वाजल्यापासून पुन्हा शोधकार्य सुरू करण्यात आलं. पोलिसांसह रेस्कु पथकही शोधकार्यात सहभागी आहे. मात्र सायंकाळी ४ पर्यंत तरी गौतमचा शोध लागला नाही. या घटनेमुळे सिंहगड किल्ल्यावर आलेल्या पर्यटकांमध्ये चिंतेचे वातावरण आहेत. पुढील काही तासांत शोधकार्याला यश मिळेल का, याकडे सर्वांचे लक्ष लागले आहे.सिंहगड किल्ल्यावर दुर्घटना होण्याची ही काही पहिलीच वेळ नाही.यापूर्वी देखील अनेकदा अशा घटना घडल्या आहेत. पर्यटनस्थळ म्हणून सिंहगड किल्ल्यावर हजारो नागरिक फिरायला येतात. अशावेळी अशा घटनांमुळे सुरक्षेचा प्रश्न पुन्हा एकदा ऐरणीवर आला आहे. काही काळापूर्वी देखील सिंहगड कड्यांवरून घसरून पर्यटक जखमी झाल्याच्या घटना घडल्या आहेत. त्यामुळे प्रशासनाकडून पर्यटकांनी दक्षता घेण्याचे आवाहन करण्यात आले आहे.