भूकरमापक संवर्गातील ९०३ पदांच्या परीक्षेचा निकाल जाहीर 

भूकरमापक पदाच्या भरतीसाठी राज्यातून ३४ हजार ५३२ उमेदवारांनी ऑनलाइन अर्ज केले होते.

पुणे : भूमिअभिलेख विभागातील भूकरमापक संवर्गातील ९०३ पदांसाठी घेण्यात आलेल्या परीक्षेचा निकाल शुक्रवारी (दि. ३०) जाहीर करण्यात आला. भूमिअभिलेख विभागाच्या ‘महाभूमी’ या संकेतस्थळावर, तसेच संबंधित उपसंचालक, भूमिअभिलेख कार्यालयाच्या नोटीस बोर्डावर याची सविस्तर यादी प्रसिद्ध करण्यात आली आहे.

भूकरमापक पदाच्या भरतीसाठी राज्यातून ३४ हजार ५३२ उमेदवारांनी ऑनलाइन अर्ज केले होते. त्यापैकी ३० हजार ६५६ उमेदवारांनी आॉनलाइन परीक्षा दिली. ही परीक्षा १३ व १४ नोव्हेंबर २०२५ या कालावधीत दररोज दोन सत्रांमध्ये घेण्यात आली होती.

या निवड यादीतील संवर्गनिहाय पात्र उमेदवारांना नियुक्ती देण्यासाठी कागदपत्रांची छाननी विभागनिहाय उपसंचालक, भूमिअभिलेख कार्यालयामार्फत करण्यात येणार आहे. पात्र उमेदवारांनी संबंधित भूमिअभिलेख विभागाच्या उपसंचालक यांच्या कार्यालयाशी संपर्क साधावा, असे आवाहन भूमिअभिलेख विभागाकडून करण्यात आले आहे.