यवत : पडवी (ता. दौंड) येथील विवाहितेने पती आणि सासूच्या जाचाला कंटाळून विषारी कीटकनाशक पिऊन आत्महत्या केली आहे. ही घटना १७ मार्च २०२५ रोजी घडली. विषारी कीटकनाशक घेतल्यानंतर तिच्यावर खासगी रुग्णालयात उपचार सुरू होते. उपचारांदरम्यान तिचा मृत्यू झाला.
सारिका प्रशांत शितोळे (वय ३५) असे मृत विवाहितेचे नाव आहे. तिला एक लहान मुलगादेखील आहे. याबाबत मुलीचे वडील जयसिंग फक्कडराव पवार (६६, रा केडगाव, ता. दौंड) यांनी यवत पोलिसांत फिर्याद दिली आहे. पोलिसांनी याप्रकरणी आरोपी पती प्रशांत मानसिंग शितोळे व सासू सुनीता मानसिंग शितोळे यांच्याविरोधात गुन्हा दाखल केला असून, पती प्रशांत शितोळे याला अटक केली आहे.
याबाबत पोलिसांत दिलेल्या फिर्यादीनुसार आरोपी पती आणि सासूने डिलिव्हरीसाठी गेलेले २५ हजार रुपयांची वेळोवेळी मागणी करीत होते. तसेच मृत सारिका हिचा मुलगा विहान याचे दुभंगलेले ओठ या कारणावरून सारिका हिचा वारंवार मानसिक आणि शारीरिक छळ केला होता. तसेच नवरा प्रशांत याची बाहेर सुरू असलेले अनैतिक संबंध यातून मारहाण करून तिला त्रास देऊन आत्महत्येस प्रवृत्त केले होते.
गुढीपाडव्याला जाणार होते नवीन घरात; सासूच्या जाचाला कंटाळून सुनेने उचललं टोकाचं पाऊल.
उपचारांदरम्यान सारिका हिचा मृत्यू झाल्यानंतर शोकाकुल वातावरणात तिच्यावर पडवी येथे अंत्यसंस्कार करण्यात आले. दरम्यान, विवाहितेच्या नातेवाइकांनी याबाबत पोलिसांनी सखोल तपास करण्याची मागणी केली आहे. विवाहिता नक्की स्वतः विषारी कीटकनाशक प्यायली की तिला बळजबरीने पाजले गेले ? याचा तपास पोलिसांनी करावा, अशी मागणी नातेवाइकांनी केली आहे.