नारायणगाव : कुकडी प्रकल्पांतर्गत असलेल्या जुन्नर व आंबेगाव तालुक्यातील सहा धरणांच्या पाणलोट क्षेत्रात १० मे २०२५ पासून झालेल्या पावसामुळे जुन्नर तालुक्यातील वडज, येडगाव, माणिकडोह, पिंपळगाव जोगा आणि चिल्हेवाडी आणि आंबेगाव तालुक्यातील डिंभा धरण तसेच प्रकल्पांतर्गत असलेल्या विसापूर, घोड या आठ धरणात ५.६ टीएमसी पाणीसाठा नव्याने आला असल्याने काही प्रमाणात दिलासा मिळाला आहे.
सद्यस्थितीत सर्व धरणांमध्ये एकूण ६,७०३ दलघ फूट (६.७ टीएमसी) उपयुक्त पाणीसाठा असून धरणांची टक्केवारी २२.५९ टक्के झाली आहे, अशी माहिती नारायणगाव येथील कुकडी पाटबंधारे विभाग क्र.०१ चे कार्यकरी अभियंता प्रशांत कडुसकर यांनी दिली.
या वर्षी मे मध्येच पावसाला सुरवात झाल्याने वडज, माणिकडोह, पिंपळगाव जोगा, चिल्हेवाडी डिंभा या धरणांच्या पाणलोट क्षेत्रात पावसाचे पाणी येण्यास सुरुवात झाली आहे. मात्र सलग आणि मुसळधार पाऊस असताना म्हणावा असा धरणात पाणीसाठा झालेला नाही. विसापूर आणि घोड धरणात पाणीसाठा समाधानकारक वाढला आहे. विसापूर धरण ८९.६५ टक्के तर घोड धरण ७६.९५ टक्के भरलेले आहे.
धरणातील पाणीसाठा आणि टक्केवारी पुढीलप्रमाणे : येडगाव १,०३८ दशघ फूट (५३.४० टक्के), माणिकडोह १२८८ दशघ फूट (१२.६६ टक्के), पिंपळगाव जोगा वजा - १७७ दशघ फूट (४.५६ टक्के), वडज ५८८ दशघ फूट (५०.१४ टक्के), चिल्हेवाडी ५९७ दशघ फूट (७४.४४ टक्के), डिंभा ३,७८८ दशघ फूट (३०.३२ टक्के), विसापूर ८१० दशघ फूट (८९.६५ टक्के), घोड ३७५० दशघ फूट (७६.९५ टक्के).
कुकडी प्रकल्पातील सर्व धरणांमध्ये एकूण ६,७०३ दशघ फूट (२२.५९ टक्के) उपयुक्त पाणीसाठा आहे. गेल्या वर्षी आजमितीला या सर्व धरणांमध्ये १०८१ दशघ फूट (३.६५ टक्के) उपयुक्त पाणीसाठा उपलब्ध होता. गेल्या वर्षीच्या तुलनेत आजमितीला १८.९४ टक्के पाणीसाठा जादा आहे.
धरणातील पाणलोट क्षेत्रात या मान्सूनमध्ये झालेला पाऊस पुढीलप्रमाणे :
वडज : १७७ मिमी.
येडगाव : १३५ मिमी.
माणिकडोह : २२६ मिमी.
पिंपळगाव जोगा : १९५ मिमी.
चिल्हेवाडी : १८५ मिमी.
डिंभा : ३३१ मिमी.
विसापूर : २७ मिमी.
घोड : ६४ मिमी.