Pune Rain : परिस्थिती नियंत्रणात येईपर्यंत कार्यालय सोडू नका; महापालिका आयुक्तांचे अधिकाऱ्यांना आदेश

अवकाळी पावसामुळे उद्भवलेल्या आपत्तीजनक परिस्थितीत नागरिकांच्या सुरक्षिततेस प्राधान्य देऊन तत्काळ आवश्यक त्या उपाययोजना कराव्यात.

पुणे : अवकाळी पावसाच्या काळात अतिवृष्टी, पाणी साचणे, पूरस्थिती आदी आपत्कालीन परिस्थिती उद्भवलेली आहे. त्यामुळे सर्व संबंधित अधिकारी व कर्मचाऱ्यांनी परिस्थिती पूर्णपणे नियंत्रणात येईपर्यंत मुख्यालय सोडू नये, असे आदेश महापालिका आयुक्त नवल किशोर राम यांनी दिले आहेत.

अवकाळी पावसामुळे उद्भवलेल्या आपत्तीजनक परिस्थितीत नागरिकांच्या सुरक्षिततेस प्राधान्य देऊन तत्काळ आवश्यक त्या उपाययोजना कराव्यात. आपत्कालीन परिस्थिती हाताळण्यासाठी संबंधित यंत्रणांशी समन्वय साधून कार्यवाही करावी.

तसेच आवश्यकतेनुसार पाणी निचरा, रस्ते स्वच्छता, धोकादायक स्थळांची पाहणी व इतर उपाययोजना तातडीने राबविण्यात याव्या. वरिष्ठ अधिकारी यांना परिस्थितीबाबत वेळोवेळी माहिती द्यावी, यामध्ये कोणत्याही प्रकारची निष्काळजीपणा केल्यास संबंधितांवर कारवाई करण्याचा इशारा आयुक्तांनी दिला आहे.