पुणे : गुईलेन बॅरे सिंड्रोम (जीबीएस) रुग्णांमध्ये दररोज वाढ होत असून, सोमवारी नव्याने पाच रुग्ण आढळले आहेत. यामुळे पुण्यातील जीबीएस संशयित रुग्णसंख्या १६३ झाली आहे. यापैकी ४७ रुग्णांना डिस्चार्ज मिळाला असून, ४७ रुग्ण आयसीयूमध्ये आणि २१ रुग्ण व्हेंटिलेटरवर आहेत.
बाधितांमधील ३२ रुग्ण पुणे महापालिका क्षेत्रातील, तर ८६ रुग्ण समाविष्ट गावातील आहेत. पिंपरी-चिंचवड महापालिका क्षेत्रातील १८, ग्रामीणमधील १९ आणि इतर जिल्ह्यातील ८ रुग्णांचा यात समावेश आहे. बाधित रुग्णसंख्येत २० ते २९ वयोगटातील सर्वाधिक ३५, तर ० ते ९ वयोगटातील २४ आणि ५० ते ५९ वयोगटातील २५ रुग्णांचा समावेश आहे.
पालिकेने केले ४३ हजार घरांचे सर्वेक्षण
गुईलेन बॅरी सिंड्रोम (जीबीएस) बाधितांची संख्या वाढत असल्यामुळे पुणे महापालिका ॲक्शन माेडवर आली आहे. समाविष्ट गावांमध्ये सर्वेक्षण, विहिरीच्या पाण्यात क्लोरिनची मात्रा वाढविणे, सांडपाणी वाहिन्यांची दुरुस्ती, ऑक्सिजन व व्हेंटिलेटर खाटांची उपलब्धता, रुग्णांना मोफत उपचार, रुग्णांच्या नातेवाइकांचे समुपदेशन ते विविध प्रकारच्या उपाययोजना केल्या जात आहेत. महापालिकेकडून ४३ हजार घरांचे सर्वेक्षण पूर्ण केले आहे. गावांमध्ये २० हजार मेडिक्लोअरच्या बाटल्यांचे वाटप केले आहे. विशेषतः खासगी रुग्णालयांकडून रुग्णांची होणारी आर्थिक लूट थांबविण्यासाठी संबंधित रुग्णालयांवर वैद्यकीय अधिकाऱ्यांद्वारे लक्ष ठेवले जात आहे.
सर्वाधिक रुग्ण २० ते २९ वयोगटातील
पुण्यात आतापर्यंत १६८ जीबीएसचे रुग्ण सापडले आहेत. यामध्ये बरे होण्याचे प्रमाणही वाढत आहेत. परंतु जीबीएस झालेल्या एकूण रुग्णांमध्ये २० ते २९ वयोगटातील रुग्णांची संख्या जास्त म्हणजे संख्या ३५ आहे. यानंतर ५० ते ५९ वयोगटातील रुग्णांची संख्या २५ आहे.