पुणे : बाप, काका आणि भाऊ या नात्याला काळिमा फासणारी घटना मांजरी परिसरात घडली आहे. एका तेरा वर्षीय अल्पवयीन मुलीवर तिच्याच जन्मदात्या बापासह, काका आणि चुलत भावाने बलात्कार केल्याची खळबळजनक घटना समोर आली आहे. जुलै २०२२ ते १० जून २०२४ या कालावधीत या तीन नराधमांनी पीडित चिमुकलीवर अत्याचार केले. पिडीतेने दिलेल्या फिर्यादीवरून तिन्ही आरोपींविरोधात बलात्कारासह अन्य कलमांन्वये हडपसरपोलिस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, पीडितेने सततच्या त्रासाला कंटाळून ही घटना शाळेतील शिक्षिकेकडे सांगितली, त्यानंतर संबंधित शिक्षिकेने याबाबत अल्पवयीन मुलांसाठी काम करणाऱ्या एका संस्थेला कळवले. संस्थेतील समुपदेशक शुभांगी घरबुडे आणि प्रमोद पाटील यांनी मुलीला घेऊन हडपसर पोलिस ठाण्यात येत तक्रार दिल्यानंतर हा सर्व प्रकार उघड झाला. हे कुटुंब परप्रांतीय असून कामानिमित्त शहरात वास्तव्यास आहे. पीडित मुलगी तिच्या आई, वडील, काका आणि चुलत भाऊ अशा एकत्र कुटुंबात मांजरी परिसरात राहायला आहे. जुलै २०२२ मध्ये तिच्या चुलत भावाने राहत्या घरामध्ये वरच्या खोलीत तिला एकटे गाठले. तिला ‘चल प्यार करेंगे’ असे म्हणत अश्लील कृत्य करण्याचा प्रयत्न केला, त्याला पीडितेने नकार दिला असता तिला लोखंडी रॉडचा धाक दाखवला. त्यानंतर पीडितेवर बलात्कार केला. त्रास झाल्यामुळे तिने आरडाओरडा करत स्वतःची कशीबशी सुटका करून घेत पळ काढला. चुलत भावाने पीडितेला ही गोष्ट कोणाला सांगितल्यास ‘ठार मारून टाकीन’ अशी धमकी दिली होती.
त्यानंतर जानेवारी २०२४ मध्ये एका रात्री पीडित मुलगी घरात झोपली होती. त्यावेळी तिचा काका (चुलता) त्या ठिकाणी आला. तिच्या अंथरूणामध्ये शिरून त्याने तिचे कपडे काढण्याचा प्रयत्न केला आणि तिच्यावर बलात्कार केला. त्यानंतर काही दिवसांनी या मुलीची आई गावी गेलेली होती. त्यावेळी तिच्या वडिलांनी जबरदस्ती करत पीडितेवर बलात्कार करण्याचा प्रयत्न केला. पीडित मुलीने वडिलांना विरोध केला असता त्यांनी तिला मारहाण केल्याचे फिर्यादीत म्हटले आहे. अशा प्रकारे वडील तिला दररोज त्रास देत असल्याचे देखील पीडितेने पोलिसांना सांगितले. पोलिसांनी तिन्ही नराधमांना अटक केली असून, याप्रकरणाचा पुढील तपास पोलिस उपनिरीक्षक बिराजदार करत आहेत.