कोरेगाव पार्क येथील फ्लॅटमध्ये सुरू असलेल्या वेश्या व्यवसायाचा पर्दाफाश

महिलांना पैशाचे आमिष दाखवून थायलंड येथून ब्युटी पार्लरचे काम करण्याच्या बहाण्याने बोलवून घेत तिच्या फ्लॅटमध्ये ठेवले होते

पुणे : कोरेगाव पार्क परिसरातील फ्लॅटमध्ये सुरु असलेल्या वेश्या व्यवसायाचा कोरेगाव पार्क पोलिसांनी पर्दाफाश केला आहे. या कारवाईत थायलंड येथील दोन महिलांची सुटका करुन महिला स्पा मालकावर गुन्हा दाखल केला आहे. ही कारवाई गुरुवारी (दि. १५) दुपारी साडेचारच्या सुमारास कोरेगाव पार्क परिसरातील साऊथ मेन रोड येथील सुखवाणी क्लासिक मधील दुसऱ्या मजल्यावरील फ्लॅट नंबर ८ येथे करण्यात आली आहे.

मोकडा गेथाईसॉन्ग (मूळ रा. थायलंड) हीच्यावर अनैतिक मानवी वाहतूक प्रतिबंधक अधिनियम कायद्यान्वये गुन्हा दाखल करण्यात आला आहे. याप्रकरणी पोलिस हवालदार रईसा समीर बेग (३८) यांनी कोरेगाव पार्क पोलिस ठाण्यात फिर्याद दिली आहे.

कोरेगाव पार्क येथील सुखवाणी क्लासिक मधील दुसऱ्या मजल्यावरील फ्लॅटमध्ये वेश्या व्यवसाय सुरु असल्याची माहिती कोरेगाव पार्क पोलिसांना मिळाली. त्यानुसार पोलिसांनी ग्राहक पाठवून खात्री करुन घेतली. त्यानंतर छापा टाकून थायलंड येथील दोन महिलांची सुटका केली. आरोपीने पीडित महिलांना पैशाचे आमिष दाखवून थायलंड येथून ब्युटी पार्लरचे काम करण्याच्या बहाण्याने बोलवून घेत तिच्या फ्लॅटमध्ये ठेवले होते. आरोपी त्यांच्याकडून वेश्या व्यवसाय करुन घेत होती. यातून मिळणाऱ्या पैशातून स्वत:ची उपजीविका भागवत असल्याचे तपासात निष्पन्न झाले आहे. याप्रकरणाचा पुढील तपास पोलिस निरीक्षक (गुन्हे) चेतन मोरे करत आहेत.