पालिकेतही बापटांच्या गटाला धक्का

स्थायी समितीचे माजी अध्यक्ष व नगरसेवक गणेश बीडकर यांची भारतीय जनता पक्षाच्या गटनेतेपदी निवड करण्यात आली.

पुणे : स्थायी समितीचे माजी अध्यक्ष व नगरसेवक गणेश बीडकर यांची भारतीय जनता पक्षाच्या गटनेतेपदी निवड करण्यात आली. खासदार व शहराध्यक्ष अनिल शिरोळे यांनी बीडकर यांच्या निवडीचे पत्र महापौर चंचला कोेद्रे यांना दिले. महापालिकेच्या २०१२च्या सार्वत्रिक निवडणुकीत भाजपचे २६ नगरसेवक निवडून आले होते. त्या वेळेपासून बीडकर हे गटनेते पदाच्या स्पर्धेत होते. मात्र, ज्येष्ठ आमदार गिरीश बापट यांचे समर्थक नगरसेवक अशोक येनपुरे यांची गटनेतेपदी निवड झाली. गेल्या दोन वर्षांपासून येनपुरे महापालिकेतील भाजपचा कारभार पाहत आहेत. सध्या महापालिकेच्या पदाधिकार्‍यांच्या जपान दौर्‍यात ते सहभागी असताना अचानक बीडकर यांची निवड जाहीर केली आहे. लोकसभा निवडणुकीत शहराध्यक्ष अनिल शिरोळे यांच्या प्रचारात बीडकर यांनी महत्त्वाची भूमिका पार पाडल्याच्या पार्श्वभूमीवर त्यांना गटनेते पदाचे बक्षीस मिळाल्याचे बोलले जात आहे. तसेच, भाजपचे ज्येष्ठ नेते नितीन गडकरी समर्थक गिरीश बापट यांच्या गटाला या निवडीमुळे धक्का बसल्याची चर्चा आहे. भाजपचे प्रदेशाध्यक्ष देवेंद्र फडणवीस, ज्येष्ठ नेते गोपीनाथ मुंडे, एकनाथ खडसे, विनोद तावडे, सुधीर मुनगंटीवार यांच्या प्रदेश कोअर कमिटीची बैठक २३ मे रोजी मुंबईला झाली. त्या वेळी बीडकर यांच्या नावावर एकमताने शिक्कामोर्तब करण्यात आले. गेल्या १२ वर्षांपासून बीडकर नगरसेवक म्हणून कार्यरत आहेत. यापूर्वी स्थायी समिती व शहर सुधारणा समिती अध्यक्षपदाची जबाबदारी त्यांनी समर्थपणे पार पाडली आहे. भाजपच्या नगरसेवकांच्या बैठकीतही बीडकर यांच्या नावाला मान्यता मिळाली आहे, असे अनिल शिरोळे यांनी महापौरांना दिलेल्या पत्रात म्हटले आहे. (प्रतिनिधी)