पुणे : तुमच्या मुलीचे लग्न माझ्याशी लावून दिले नाही तर दुसरीकडे कोठे लग्न होऊ देणार नाही,अशी धमकी दिल्याने एका मुलीच्या वडिलाने गळफास घेऊन आत्महत्या केल्याचा धक्कादायक प्रकार समोर आला आहे. परमेश्वर रमेश पात्रे (वय ४०, रा. गोंधळेनगर, हडपसर) असे आत्महत्या केलेल्या वडिलांचे नाव आहे. याबाबत हडपसर पोलिसांनी मुकेश गोपाळ देढे (वय २१, रा. चंदननगर चौकीसमोर, खराडी) याच्याविरुद्ध गुन्हा दाखल केला आहे. हा प्रकार जून २०२२ ते ७ मे २०२३ दरम्यान घडला. परमेश्वर पात्रे यांच्या पत्नीने हडपसर पोलीस ठाण्यात फिर्याद दिली आहे.
याबाबत पोलिसांनी दिलेल्या माहितीनुसार, फिर्यादी यांच्या मुलीचे मुकेश देढे याच्याबरोबर प्रेमसंबंध होते. देढे हा काही कामधंदा करत नाही. त्यामुळे पात्रे यांचा लग्नाला विरोध होता. त्यांनी दुसरीकडे मुलीचे लग्न जुळविण्याचा प्रयत्न केला तर तो अडथळे आणत होता. मुकेश देढे हा फिर्यादी यांच्या मुलीबरोबर लग्न करणार असल्याचे सांगत होता. तुम्हाला काय करायचे ते करा, जर तुम्ही मुलीचे लग्न माझ्यासोबत लावून दिले नाही तर तिचे दुसरीकडे कोठेही लग्न होऊ देणार नाही, अशी धमकी तो वारंवार देत होता. त्याच्या सततच्या धमक्यांमुळे ७ मे रोजी परमेश्वर पात्रे यांनी घरासमोरील बाथरुममध्ये जाऊन गळफास घेऊन आत्महत्या केली. धार्मिक विधी पूर्ण केल्यानंतर आता फिर्याद देण्यात आली असून पोलीस उपनिरीक्षक दिगंबर सोनटक्के तपास करीत आहेत.