प्रेम विवाहानंतर तिसऱ्याच महिन्यात पत्नीची हत्या; रात्रभर मृतदेहाजवळ बसून होता पती, मग केला असा बनाव

पोलिसांनी वैभवला चौकशीसाठी ताब्यात घेतले आणि पोलिसी खाक्या दाखवला. यानंतर वैभव पोपटासारखा बोलू लागला...

पुणे- देहू येथे क्षुल्लक कौटुंबिक वादातून एकाने गळा आवळून पत्नीची हत्या केल्याची धक्कादायक घटना समोर आली आहे. वैभव लांबकाणे असे आरोपीचे नाव आहे. तो देहू येथील वडाचा मळा येथील रहिवासी आहे. वैभवने घराजवळच राहणाऱ्या पूजा पाटील हिच्यासोबत गेल्या तीन महिन्यांपूर्वी प्रेम विवाह केला होता.

वैभव लांबकाणे याच्या घरच्यांचा त्यांच्या विवाहाला विरोध होता. विवाहानंतर वैभव आणि पूजा यांच्यात अनेक क्षुल्लक कारणांवरून भांडण व्हायची. छोट-छोट्या कारणांवरून वैभव पूजाला मानसिक आणि शारीरिक त्रासही देऊ लागला होता. वैभव आणि पूजा यांच्यात गुरूवारी सायंकाळच्या सुमारास  जोरदार भांडण झाले होते. मध्यरात्री पूजा झोपेत असतानाच भांडणाचा बदला घेण्यासाठी वैभवने तिचा गळा आवळला. यानंतर जीव वाचविण्यासाठी पूजाने बराच प्रयत्न केला. मात्र, मृत्यू होईपर्यंत वैभवने तिचा गळा सोडला नाही.

पूजाच्या मृत्यूनंतर वैभव रात्रभर तिच्या मृतदेहा जवळच बसून होता. यानंतर सकाळ होताच त्याने मृत पूजाच्या नातलगांना फोन केला आणि पूजाच्या छातीत दुखत होते यामुळे तिचा हृदयविकाराचा झटका आल्याने मृत्यू झाला, असे सांगितले. या निरोपानंतर, पूजाचे नातलग तत्काळ पूजाच्या घरी दाखल झाले. तेव्हा बिछाण्यातच पूजाचा मृतदेह त्यांच्या निदर्शनास आला. यानंतर त्यांनी देहूरोड पोलिसांना संबंधित घटनेची माहिती दिली. 

घटनेची माहिती मिळताच पोलिसांनी घटनास्थळी धाव घेतली. तेथे शहानिशा केली असता संपूर्ण प्रकार संशयास्पद असल्याचे त्यांच्या लक्षात आले. त्यांनी वैभवला चौकशीसाठी ताब्यात घेतले आणि पोलिसी खाक्या दाखवला. यानंतर वैभव पोपटासारखा बोलू लागला आणि कौटुंबिक वादातून आपण गळा आवळून पूजाची हत्या केल्याची कबुली त्याने दिली.