पुणे : अरबाज हा सराईत गुन्हेगार लोकांना मारहाण करुन खिशातील पैसे काढून घेत. विक्रेत्यांच्या वस्तू उचलून घेऊन जात असे. यामुळे त्याला सर्वच त्रासले होते. आई बहिणीवरुन शिवीगाळ करत असे. त्याने एकाच्या बहिणीची छेड काढली, त्यामुळे त्याच्या त्रासाला कंटाळून त्यांनी कट रचून या सराईत गुन्हेगाराचा काटा काढला. लष्कर पोलिसांनी तिघांना अटक केल्यानंतर खूनामागचे खरे कारण आता समोर आले आहे.
फैजान रफिक शेख (वय २६, रा. चुडामण तालीमजवळ, भवानी पेठ), गुफरान मुज्जफर मोमीन (वय २१, रा. याकुबनगर चौक, भवानी पेठ) आणि जगदीश शंकर दोडमणी (वय २२, रा. भवानी पेठ) अशी अटक केलेल्यांची नावे आहेत. अरबाज ऊर्फ बबन इकबाल शेख (वय ३५, रा. भवानी पेठ) असे खून झालेल्या सराईत गुन्हेगाराचे नाव आहे. खूनाची ही घटना ताबुत स्ट्रिटवरील सार्वजनिक रोडवर शनिवारी पहाटे ३ वाजून २७ मिनिटांनी घडली होती.
पोलिसांनी दिलेल्या माहितीनुसार, अरबाज शेख याच्यावर खूनाचा प्रयत्न, जबरी चोरी, चोरी, मारहाण, विनयभंग असे किमान २५ गुन्हे समर्थ व खडक पोलीस ठाण्यात दाखल होते. भवानी पेठ आणि कॅम्प भागातील विक्रेत्यांवर तो दादागिरी करीत असे. गाड्यांवर मोफत खाणे, विक्रेत्यांकडील वस्तू जबरदस्तीने उचलून नेणे असे प्रकार तो करत असे. त्याच्या दादागिरीमुळे परिसरातील लोक वैतागले होते. पोलीस आयुक्तांनी शेख याच्या विरुद्ध झोपडपट्टी दादा प्रतिबंधक कायद्यान्वये (एमपीडीए) कारवाई करुन त्याला स्थानबद्ध केले होते. दहा दिवसांपूर्वीच त्याची सुटका झाली होती.
सुटून आल्यानंतर त्याने पुन्हा लोकांना त्रास देण्यास सुरुवात केली. त्याने एका महिलेची छेड काढली होती. त्यामुळे संतापलेल्या आरोपींनी कट रचला. त्याला मध्यरात्रीनंतर ताबुत स्ट्रिट येथे बोलावले. यावेळी त्यांच्यात भांडणे झाली. तेव्हा आरोपींनी धारधार शस्त्राने त्याच्या डोक्यावर, खांद्यावर, पोटावर, छातीवर व हनुवटीवर सपासप वार करुन त्यांचा खून केला. पोलीस निरीक्षक प्रियंका शेळके पुढील तपास करीत आहेत.