बारामती : कॅन्सर झालेल्या रुग्णास कॅ न्सर बरा करतो, असे सांगून बारामती शहरातील एकाची २ लाख ५१ हजार ५०० रुपयांची फसवणुक केल्याप्रकरणात फरार असलेल्या मनोहर उर्फ मामा भोसलेला पुणे ग्रामीण पोलिस स्थानिक गुन्हे शाखा व बारामती तालुका पोलिसांनी सातारा जिल्ह्यातील लोणंद गावच्या हद्दीत ताब्यात घेतले आहे. लवकरच अटक केली जाणार आहे.
पोलीस सुत्रांनी दिलेल्या माहितीनुसार, शशीकांत खरात (रा.साठेनगर, कसबा बारामती ता बारामती जि पुणे) यांनी बारामती ग्रामीण पोलीस ठाण्यात तक्रार दिली आहे. त्यानुसार तक्रारदार खरात यांचे वडीलांना थायरॉईड कॅन्सर हा दुर्धर आजार झाला आहे. त्यामुळे खरात हे मनोहरमामा भोसले भोंदुबाबाच्या मौजे मठामध्ये गेले. त्याने तो बाळूमामा यांचा अवतार असल्याचा बनाव केला.
तक्रारदार यांच्या वडीलांचा गळयावरील थायरॉईड कॅन्सर बरा करतो, असे सांगून त्यावरील औषध म्हणून बाभळीचा पाला, साखर, भंडारा खाण्यास दिले. तसेच विशाल वाघमारे उर्फ नाथबाबा व ओंकार शिंदे यांच्यासोबत संगनमत करून वेळोवेळी चढावा, अभिषेक व भेटीसाठी त्यांचेकडून एकुण २,५१,५००/- रुपये त्यांचे व त्यांचे वडीलांचे जिवाचे बरे वाईट होईल अशी भिती घालून देण्यास भाग पाडून त्यांची फसवणूक केली आहे. पैसे परत मागीतल्यास जिवे ठार मारण्याची धमकी दिल्याची फिर्याद तालुका पोलीस ठाण्यात दाखल आहे.
त्यानंतर या प्रकरणातील आरोपींना अटक करण्यासाठी पोलिसांचा कसून तपास सुरु होता. आज आरोपी मनोहर मामा भोसले (रा. उंदरगांव ता. करमाळा जि.सोलापुर)यास ताब्यात घेण्यात यश आले आहे. त्याला बारामती तालुका पोलीस ठाण्यात आणत अटक केली जाणार आहे. उर्वरीत विशाल वाघमारे उर्फ नाथबाबा , ओंकार शिंदे हे दोघे आरोपी फरारी आहेत. फरारी आरोपींना देखील लवकरच अटक करण्यात येईल, त्यांच्या मागावर पोलीस पथके असल्याचे पोलीस निरीक्षक महेश ढवाण यांनी सांगितले.
फार्महाऊस मधून घेतले ताब्यात
मनोहर मामा भोसले यास साताऱ्यात ताब्यात घेतल्याप्रकरणी अपर पोलीस अधिक्षक मिलींद मोहिते यांनी ‘लोकमत’ शी बोलताना सांगितले कि, मनोहर मामा भोसले यास सातारा फलटण रस्त्यावरील सालपे गावी ताब्यात घेण्यात आले आहे. शुक्रवारी दुपारी ३ च्या सुमारास भोसले यास सालपे गावातील एका फार्महाऊसवर अटक करण्यात आली आहे. तो या फार्म हाऊसमध्ये लपून बसला होता. हे फार्महाऊस त्याच्या मालकीचे आहे का? त्या ते अन्य कोणाचे आहे.फार्महाऊस अन्य कोणाचे असल्यास त्याला कोणी आसरा दिला होता का, याबाबत पोलीस कसून शोध घेत असल्याचे मोहिते यांनी स्पष्ट केले.