पुणे : व्याजावर पैसे घेतल्यानंतर त्यातील निम्म्याहून अधिक पैसे परत केले होते. तरीही इतकीच रक्कम आताच्या आता परत कर, असे बोलून अश्लील शिवीगाळ केली. पैसे दिले नाही तर तृतीयपंथी आणून बसवतो, असे म्हणून पार्लरमधील शिलाई मशीन उचलून घेऊन गेल्याचा प्रकार समोर आला आहे. याप्रकरणी एका ३७ वर्षीय महिलेने भारती विद्यापीठ पोलिस ठाण्यात फिर्याद दिली. त्यावरून पोलिसांनी महेश खडके याच्याविरोधात गुन्हा दाखल केला.
पोलिसांनी दिलेल्या माहितीनुसार, फिर्यादी महिलेचे ब्युटी पार्लर आहे. फिर्यादी व आरोपी ओळखीचे आहेत. फिर्यादी यांनी महेश खडके याच्याकडून ३० हजार रुपये घेतले होते. त्यापैकी २१ हजार रुपये परत केले होते. असे असताना १५ दिवसांपूर्वी महेश खडके हा पार्लरवर आला. फिर्यादीस व्याजासह आताचे आता ३० हजार रुपये दे, असे बोलून घाण घाण शिवीगाळ केली. पार्लरवर तृतीयपंथी आणून बसवतो व घरात सुद्धा येऊन बसतो, अशी धमकी दिली.
पार्लरमध्ये ठेवलेले शिलाई मशीन तो उचलून घेऊन गेला. विनंती करूनही शिलाई मशीन परत न केल्याने १५ दिवसांनी या महिलेने पोलिसांकडे फिर्याद दिली. पोलिसांनी महिलांचा अपमान करणे, विनयभंगाच्या उद्देशाने बळाचा वापर करणे, धमकी देणे अशा भारतीय न्याय संहितेच्या विविध कलमांखाली गुन्हा दाखल केला आहे. मात्र, व्याजाने पैसे दिले असतानाही सावकारी विरोधी कायद्याखाली गुन्हा दाखल करण्यात आलेला नाही. पोलिस उपनिरीक्षक निकम पुढील तपास करत आहेत.