कोरोना काळात ऑनलाइन क्लासच्या बहाण्याने चार मुलींचा विनयभंग; कराटे शिक्षकास पाच वर्षे सक्तमजुरीची शिक्षा

शिक्षेसह ४० हजारांचा दंड; दंडाची रक्कम पीडितांना देण्याचे आदेश

पुणे : कोरोना काळात ऑनलाइन कराटे शिकविण्यासाठी आलेल्या विद्यार्थिनींचा फिटनेस चेक करण्याच्या बहाण्याने विनयभंग करणाऱ्या कराटे शिक्षकास न्यायालयाने पाच वर्षे सक्तमजुरी आणि ४२ हजार रुपये दंडाची शिक्षा सुनावली. विशेष न्यायाधीश (पोक्सो) कविता शिरभाते यांनी हा निकाल दिला. तसेच, २ हजार रुपये सरकारी तिजोरीत जमा करण्यात यावेत. दंड न भरल्यास दोन महिने अतिरिक्त साधा कारावास भोगावा लागेल असेही न्यायालयाने निकालात नमूद केले.

शंकर हनुमंत मालुसरे (वय ४४, रा. गणराज अपार्टमेंट, बालाजीनगर, धनकवडी) असे शिक्षा झालेल्याचे नाव आहे. सरकार पक्षातर्फे नितीन कोंघे यांनी काम पाहिले. त्यांनी सहा साक्षीदार तपासले. यामध्ये, फिर्यादी व इतर तीन पीडितांची साक्ष महत्त्वाची ठरली. आरोपीने गंभीर गुन्हा केला असून, त्याला जास्तीत-जास्त शिक्षा देण्याची मागणी ॲड. कोंघे यांनी केली.

या प्रकरणी, १७ वर्षीय पीडित विद्यार्थिनीने सहकारनगर पोलिस ठाण्यात फिर्याद दिली आहे. ८ ते १३ जून २०२० दरम्यान ही घटना घडली. मालुसरे हा कराटे शिक्षक आहे. तर, फिर्यादी ही त्याची विद्यार्थिनी आहे. ९ जून दिवशी ऑनलाइन कराटे क्लास घेण्यासाठी मालुसरे याने पीडितेस घरी बोलाविले. क्लास संपल्यानंतर पीडिता घरी जात असताना आरोपीने अंगावर फक्त अंतर्वस्त्र ठेवत पीडितेस फिटनेस चेक करण्यास सांगितले. त्यानंतर, दुसऱ्या दिवशी फिर्यादी घरी जात असतानाही त्याने जबरदस्तीने हाच प्रकार केला. त्यानंतर पीडितेचा फिटनेस चेक करण्याच्या बहाण्याने कपडे काढून विनयभंग केल्याची घटना घडली. याखेरीज, त्याने पत्नी घरी नसताना अन्य विद्यार्थिनींना घरी बोलावून मसाजच्या बहाण्याने विनयभंग केल्याची फिर्याद विद्यार्थिनींनी पोलिस ठाण्यात दिली.

दरम्यान, पीडितेच्या दिलेल्या फिर्यादीवरून सहकारनगर पोलिस ठाण्यात गुन्हा दाखल करण्यात आला. आरोपी शिक्षकाविरोधात गुन्हा दाखल करण्यात आल्याची माहिती समजल्यानंतर अन्य तीन विद्यार्थिनींनी तपासी अधिकारी यांच्याकडे जाऊन त्यांच्यासोबत झालेली घटना कथन केली. यावेळी, आरोपी २०१८ पासून हा प्रकार करत असल्याचे समोर आल्यानंतर गुन्ह्याचे गांभीर्य समोर आले. त्यानंतर, पोलिसांनी सखोल तपास करत आरोपीविरोधात न्यायालयात दोषारोपपत्र दाखल केले. सरकार पक्षातर्फे नितीन कोंघे यांनी काम पाहिले. त्यांनी सहा साक्षीदार तपासले. यामध्ये, फिर्यादी व इतर तीन पीडितांची साक्ष महत्त्वाची ठरली. आरोपीने गंभीर गुन्हा केला असून, त्याला जास्तीत जास्त शिक्षा देण्याची मागणी ॲड. कोंघे यांनी केली. या प्रकरणात, बचावपक्षातर्फे ॲड. इब्राहिम शेख यांनी काम पाहिले. न्यायालयाने सरकार पक्षासह बचावपक्षाचा युक्तिवाद ऐकून घेत आरोपीला शिक्षा सुनावली.