डाळज : सोलापूर वरून पुण्याच्या दिशेने निघालेल्या क्रुझर गाडीने उसाने भरलेल्या ट्रॅक्टरला पाठीमागून धडक दिल्याने मोठा अपघात झाला. यामध्ये एकाचा मृत्यू झाला असून पाच जण जखमी झाले आहे. इंदापूर तालुक्यातील भादलवाडी गावच्याहद्दीत टॉवेल कंपनी शेजारी आज सकाळी ही घटना घडली.
महामार्ग पोलीस मदत केंद्र डाळज यांनी दिलेल्या माहितीनुसार, सकाळी नऊ वाजता सोलापूर वरून पुण्याच्या दिशेने निघालेल्या क्रूझर गाडीने उसाने भरलेल्या ट्रॅकरला गाडीवरचे नियंत्रण सुटल्याने पाठीमागून जोरदार धडक दिली. या अपघातात क्रूझर गाडीचे मोठे नुकसान झाले आहे. अल्लाबक्सर मोहंमद अली यांचा मृत्यू झाला असून कासीम मुल्ला, मोहंमद हुसेन, शमिता हुंचल, हुसेनबीन बहिरोद्री,शाबाई हुंचल हे सर्वजण जखमी झाले आहेत. हे सर्व कोची कोटा विजापूर येथील रहिवाशी आहेत. अपघाताची माहिती मिळताच डाळज येथील महामार्ग मदत केंद्रातील पोलीस व महाराष्ट्र सुरक्षा दलाचे जवान घटना स्थळी दाखल झाले. त्यांनी जखमींना पुढील उपचारासाठी भिगवण येथील खाजगी रुग्णालयात दाखल केले आहे. आदल्या दिवशी रात्री झालेल्या अपघातात महिंद्रा पिकअप गाडीच्या चालकाने झोपेमध्ये आपली लेन सोडून रस्त्याच्या कडेला असणाऱ्या शेतात जाऊन पडली. यामध्ये गाडीचे मोठे नुकसान झाले व ड्रायव्हर किरकोळ जखमी झाल्याने त्याला पुढील उपचरासाठी भिगवण येथे पाठवण्यात आले होते.