पुणे: विद्युत जोडणीचे काम करताना गच्चीवर लावलेल्या शिडीवरून पडल्याने कामगाराचा (वायरमन) मृत्यू झाल्याची घटना वडगाव शेरीतील वृंदावननगर भागात घडली. कामगाराच्या सुरक्षेची काळजी न घेता हलगर्जीपणा केल्याचा ठपका ठेवून विद्युत विषयक कामे करणाऱ्या ठेकेदाराविरोधात येरवडा पोलिस ठाण्यात गुन्हा दाखल करण्यात आला आहे.
युुसुफ शेख (४७, रा. कोंढवा) असे मृत्युमुखी पडलेल्या कामगाराचे नाव आहे. वडगाव शेरीतील वृंदावननगर भागात ४ जानेवारी रोजी दुपारी ही घटना घडली होती. पोलिसांनी दिलेल्या माहितीनुसार, वडगाव शेरीतील वृंदावननगर मधील एका गृहप्रकल्पावर शेख हे विद्युत जोडणीचे काम करत होते. त्यावेळी गच्चीवर काम करत असताना लोखंडी शिडी घसरल्याने ते खाली पडले. त्यांच्या डोक्याला गंभीर दुखापत झाली. उपचारादरम्यान त्यांचा मृत्यू झाला. शेख यांना सुरक्षिततेच्या दृष्टीने योग्य ती साधनसामुग्री पुरवणे आवश्यक होते. मात्र, ठेकेदाराच्या बेजबाबदारपणामुळे दुर्घटना घडल्याचा ठपका ठेवून पोलिसांनी याप्रकरणी दोन ठेकेदारांविरुद्ध गुन्हा दाखल केला. येरवडा पोलिसांकडून या प्रकरणाचा तपास करण्यात येत आहे.