लोकमत न्यूज नेटवर्क
पुणे : खडकीयन्स स्पोर्ट्स क्लब आयोजित ‘नाईन अ साइड’ छत्रपती शिवाजी महाराज करंडक फुटबॉल स्पर्धेत सीएमएस फाल्कन अ क्लबने इंद्रायणी स्पोटर्स अ क्लबचा सडनडेथमध्ये १०-९ अशा गोलफरकाने पराभव करुन जेतेपदावर नाव कोरले. आर. आर. बॉईज क्लबला तिसऱ्या क्रमांकावर समाधान मानावे लागले. स्पर्धेत ३९ संघांनी भाग घेतला होता.
खडकीतल्या एलफिस्टन रोड येथील मैदानावर खेळल्या गेलेल्या अंतिम लढतीत सुपवॉश डोलीने सडनडेथमध्ये नोंदविलेल्या गोलच्या जोरावर सीएमएस फाल्कन अ क्लबने बाजी मारली. या सामन्यात दोन्ही संघातील खेळाडूंनी बहारदार खेळ केला. खेळाच्या सातव्याच मिनिटाला इंद्रायणी क्लबच्या आशिष सिंगच्या सुरेख पासवर करमेंद्रा सरोजने गोल करून संघाला आघाडी मिळवून दिली. उपांत्य फेरीत इंद्रायणी स्पोटर्स अ क्लबने संगम यंग बॉईजचा आणि सीएमएस फाल्कन अ क्लबने आर. आर. बॉईज क्लबचा दोन गोलच्या फरकाने पराभव केला.
स्पर्धेतील ‘सर्वोत्तम खेळाडू’चा मान फाल्कन क्लबच्या शिबू सनीला मिळाला. याशिवाय ‘उत्कृष्ट गोलरक्षक’ इंद्रायणी क्लबचा ह्रषीकेश शेडगे, ‘उत्कृष्ट डिफेंडर’ खडकीयन्स क्लबचा संमय मुखर्जी ठरला. शिस्तबद्ध संघाचे पारितोषिक रिअल पुणे युनायटेड संघाने मिळविले. स्पर्धेतील विजेत्या सीएमएस फाल्कन क्लबला २५ हजार ६६६ रुपये रोख व करंडक तर उपविजेत्या इंद्रायणी क्लबला १५ हजार ६६६ रुपये व करंडक देण्यात आला. खडकी कॅन्टोमेंट बोर्डाचे माजी उपाध्यक्ष मनीष आनंद, पूजा आनंद, माजी आमदार रमेश बागवे, ॲड. अभय छाजेड, एस. एस. अहलुवालिया, तौसिफ अन्सारी, मनीष बासू, बंडू शिंदे, इझाज सय्यद आदी पारितोषिक वितरण सोहळ्यास उपस्थित होते.