CET Exam: पीसीएम, पीसीबी आणि एमबीएची या ३ अभ्यासक्रमांच्या सीईटी परीक्षा होणार वर्षातून दोनदा

विद्यार्थ्याने दोन प्रवेश परीक्षा दिल्यास दोन्हीपैकी ज्यामध्ये जास्त गुण असतील ते प्रवेशासाठी गृहीत धरले जातील

पुणे: राज्य सामाईक प्रवेश परीक्षा कक्षाकडून आगामी शैक्षणिक वर्षात पीसीएम, पीसीबी व एमबीए या तीन अभ्यासक्रमांच्या प्रवेश परीक्षा (सीईटी) वर्षातून दोनवेळा घेण्यात येणार आहेत. त्यात पहिली प्रवेश परीक्षा एप्रिल-२०२६ मध्ये, तर दुसरी प्रवेश परीक्षा मे २०२६ मध्ये होईल, अशी घोषणा उच्च व तंत्रशिक्षण मंत्री चंद्रकांत पाटील यांनी मंगळवारी (दि. ११) केली आहे.

मंत्री पाटील यांच्या अध्यक्षतेखाली सीईटी परीक्षा संदर्भात आढावा बैठक घेण्यात आली. याप्रसंगी उच्च व तंत्रशिक्षण विभागाचे अपर मुख्य सचिव बी. वेणुगोपाल रेड्डी, सीईटी कक्षाचे आयुक्त दिलीप सरदेसाई, उच्चशिक्षण संचालक डॉ. शैलेंद्र देवळाणकर, तंत्रशिक्षण विभागाचे संचालक डॉ. विनोद मोहितकर, उच्चशिक्षण विभागाचे उपसचिव अशोक मांडे, उपसचिव प्रताप लुबाळ आदी उपस्थित होते.

मंत्री पाटील म्हणाले की, राष्ट्रीय स्तरावर जेईईच्या दोन प्रवेश परीक्षा होतात, त्यामुळे विद्यार्थ्यांना दोनदा संधी उपलब्ध होते. तशाच दोन संधी यापुढे राज्यातील मुला-मुलींनाही मिळणार आहे. विद्यार्थ्याला एक प्रवेश परीक्षा देणे बंधनकारक असून, दुसरी प्रवेश परीक्षा ऐच्छिक असेल. विद्यार्थ्याने दोन प्रवेश परीक्षा दिल्यास दोन्हीपैकी ज्यामध्ये जास्त गुण असतील ते प्रवेशासाठी गृहीत धरले जातील. येणाऱ्या वर्षी पीसीएम, पीसीबी व एमबीए या तीन अभ्यासक्रमाची पहिली प्रवेश परीक्षा एप्रिल २०२६ मध्ये; तर दुसरी प्रवेश परीक्षा मे २०२६ मध्ये होईल. या परीक्षांचे सविस्तर वेळापत्रक सीईटी कक्ष लवकरच जाहीर करणार आहे.