पुणे : पुणे शहरात भाजपच्या एका वरिष्ठ पदाधिकाऱ्यावर महिलापोलिस अधिकाऱ्याशी गैरवर्तन आणि विनयभंगाचा आरोप झाल्याने खळबळ उडाली आहे. प्रमोद विठ्ठल कोंढरे (महामंत्री, भाजप पुणे शहर) यांच्यावर फरासखाना पोलीस ठाण्यात भारतीय न्याय संहिता कलम ७४ आणि ७५(१) अंतर्गत गुन्हा दाखल करण्यात आला आहे. या घटनेने राजकीय आणि पोलिस वर्तुळातही प्रचंड चर्चा सुरू झाली आहे. या प्रकरणावरून भाजपचे शहराध्यक्ष धीरज घाटे यांनी भाष्य केलं आहे. कोंढरे यांनी माझ्याकडे राजीनामा दिल्याचे त्यांनी सांगितले आहे.
घाटे म्हणाले, प्रमोद कोंढेरे यांनी काल स्वतः या प्रकरणाची चौकशी पूर्ण होईपर्यंत मला सगळ्या पदातून मुक्त करा अशी मागणी केली होती. त्यांनी पक्षाकडे राजीनामा दिला आहे आणि आम्ही तो स्वीकारला आहे. या सगळ्या प्रकरणी पोलीस प्रशासन योग्य ती चौकशी करेल. चौकशीच्या नंतर जे काही निष्कर्ष निघतील त्या निष्कर्षानंतर भाजप योग्य ती कारवाई करेल. त्या कार्यक्रमाला मी नव्हतो मात्र तिथे गर्दी होती त्यामुळे अनावधानाने हे घडलं आहे का? याची माहिती घ्यावी लागेल आणि मगच चौकशी करावी लागेल पोलीस या विषयाचा योग्य त्या पद्धतीने तपास करतील.
घटना कशी घडली?
ही घटना सोमवारी (२३ जून) दुपारी १.३० वाजता पुण्यातील कसबा पोलीस चौकी परिसरात घडली. केंद्रीय मंत्री नितीन गडकरी यांच्या नियोजित दौऱ्यानिमित्त पोलिस बंदोबस्त ठेवण्यात आला होता. त्यावेळी काही भाजप पदाधिकारी स्थानिक चहाच्या टपरीवर थांबले होते. त्याच ठिकाणी महिला पोलिस अधिकारी ड्युटीवर होत्या. प्रमोद कोंढरे हे या ठिकाणी आल्यानंतर त्यांनी संबंधित महिला पोलिस अधिकाऱ्याला धक्का दिला आणि तिच्याशी कथितरित्या गैरवर्तन केल्याचा आरोप आहे. ही संपूर्ण घटना परिसरातील सीसीटीव्हीमध्ये कैद झाली असून त्याआधारे पोलिसांनी गुन्हा दाखल केला आहे.