पुणे : पालखी सोहळ्यात पावसामुळे वारकऱ्यांची गैरसोय होऊ नये म्हणून पहिल्यांदाच पालखी मार्गावर बारा ठिकाणी जर्मन हँगर मंडप उभारण्यात येणार आहेत. पाऊस आला तरी वारकरी मुक्कामाच्या ठिकाणी सुरक्षित राहू शकतात, अशी माहिती जिल्हा परिषदेचे मुख्य कार्यकारी अधिकारी गजानन पाटील यांनी बुधवारी पत्रकार परिषदेत दिली.
पत्रकार परिषदेस अतिरिक्त मुख्य कार्यकारी अधिकारी चंद्रकांत वाघमारे, जिल्हा आरोग्य अधिकारी डॉ. सचिन देसाई, पाणी व स्वच्छता विभागाचे उपमुख्य कार्यकारी अधिकारी आप्पासाहेब गुजर आदी उपस्थित होते.
पाटील म्हणाले, पालखी सोहळ्याच्या मुक्कामांच्या ठिकाणी ग्रामपंचायतींना स्वच्छता आणि आरोग्यासाठी देण्यात येणाऱ्या निधीमध्ये वाढ केली आहे. तीन लाखांहून आता पाच लाख रुपये केली आहे. तर दुपारच्या विसाव्यासाठी दोन लाख आणि लहान विसाव्यासाठी ग्रामपंचायतींना एक लाख रुपयांचा निधी दिला जाणार आहे. शासनाकडे आपण २५ कोटी ८४ लाख रुपयांच्या निधीची मागणी केली होती. त्यापैकी जवळपास सत्तर टक्के निधी शासनाने दिला आहे. त्याचे ग्रामपंचायतींना वितरण आजच सुरू होईल. जिल्हा परिषदेकडून दिंडी प्रमुखांना तीन हजार औषधांचे कीट वाटप करण्यात येईल, ज्यामध्ये १३ प्रकारचे औषधे आणि ती वापरण्यासाठी माहिती पत्रक दिले जाणार आहे. सोहळा मार्गस्थ झाल्यानंतर २५० कामगारांकडून साफसफाईचे काम हाती घेण्यात येईल.
शौचालयांची व्यवस्था
श्री संत ज्ञानेश्वर महाराज पालखी सोहळा - १,८०० (जाताना) - ३०० (येताना)
श्री संत तुकाराम महाराज पालखी सोहळा - १,२०० (जाताना) - २०० (येताना)
श्री संत सोपानकाका महाराज पालखी सोहळा - ३०० (जाताना)
इतर पालखी सोहळे - २५०
एकूण - ४,०५०---------
हिरकणी कक्ष - ५८
पिण्याचे पाणी टँकर - २००
टँकर भरणा केंद्र - ९८
आरोग्य केंद्र, उपकेंद्र, खासगी रुग्णालयात - १० टक्के आयसीयू खाटा राखीव
रुग्णवाहिका - १७१
पाण्याचे स्रोत तपासणीसाठी - १,३३५