प्रियकराच्या आत्महत्येच्या धमकीने तरुणीची लॉजमध्ये आत्महत्या; पुण्यातील धक्कादायक घटना

या प्रकरणी प्रियकराविरुद्ध लोणी काळभोर पोलिसांनी गुन्हा दाखल केला आहे...

पुणे : विषारी औषध पिल्याचा व्हिडीओ मोबाइलवर पाठवून प्रियकराने तरुणीला धमकी दिली. त्यामुळे घाबरलेल्या तरुणीने सासवड रस्त्यावरील एका लाॅजमध्ये गळफास घेऊन आत्महत्या केल्याची धक्कादायक घटना उघडकीस आली आहे. या प्रकरणी प्रियकराविरुद्ध लोणी काळभोर पोलिसांनी गुन्हा दाखल केला आहे.

अक्षय अरुण जोरे (रा. भेकराईनगर, हडपसर) असे गुन्हा दाखल झालेल्या तरुणाचे नाव आहे. याबाबत तरुणीच्या आईने लोणी काळभोर पोलिस ठाण्यात फिर्याद दिली आहे. पोलिसांनी दिलेल्या माहितीनुसार, तरुणी कोंढवा भागात राहायला होती. तिचे अक्षयबरोबर प्रेमसंबंध होते. अक्षय तिला लग्नासाठी धमकावत होता. ‘माझ्याशी विवाह न केल्यास मी आत्महत्या करेन,’ अशी धमकी त्याने तिला दिली होती.

अक्षयने मोबाइलवर विषारी ओैषध पिऊन आत्महत्या करत असल्याचा व्हिडीओ तिला पाठविला होता. हा व्हिडीओ पाहून तरुणी घाबरली. अक्षयचा मृत्यू झाल्यास आपल्यावर गुन्हा दाखल होईल, अशी भीती या तरुणीला वाटली. तिने सासवड रोडवरील वडकी भागातील एका लॉजमध्ये खोली घेतली. तेथे तिने खोलीत पंख्याला गळफास घेऊन आत्महत्या केली. हा प्रकार समोर आल्यावर लॉज व्यवस्थापकाने लोणी काळभोर पोलिसांना याची माहिती दिली. पोलिस उपनिरीक्षक तरटे अधिक तपास करत आहेत.