पुणे/ किरण शिंदे : 6 वर्षीय मुलाचे अक्षर सुंदर नसल्याच्या कारणावरून वर्गशिक्षिकेने या मुलाला मारहाण केली. मारहाण झाल्याचे घरी सांगितले तर आणखी मारेल अशी धमकी या मुलाला देण्यात आली. मुलाच्या वडिलांनी याप्रकरणी वानवडी पोलीस ठाण्यात तक्रार दिली असून संबंधित शिक्षिकेविरोधात गुन्हा दाखल करण्यात आला आहे.
लुल्ला नगर येथील केंद्रीय विद्यालयात हा सर्व प्रकार घडला. याप्रकरणी एका 35 वर्षीय व्यक्तीने तक्रार दिली आहे. त्यानुसार 35 वर्षीय शिक्षिकेविरोधात गुन्हा दाखल करण्यात आला आहे.
या प्रकरणी अधिक माहिती अशी की, फिर्यादी यांचा सहा वर्षीय मुलगा लुल्ला नगर येथील केंद्रीय विद्यालयात शिकण्यास आहे. फिर्यादी यांच्या मुलाचे अक्षर छान नसल्यामुळे संबंधित शिक्षिकेने त्याला हाताने मारहाण केली. जर मारहाण झाल्याचे घरी सांगितले तर तुला आणखी मारेल अशी धमकी या शिक्षिकेने दिल्याचे तक्रारीत म्हटले आहे. वानवडी पोलिसांनी या प्रकरणी गुन्हा दाखल केला असून अधिक तपास सुरू आहे.