पुणे : आई रागावल्याने आठवीतील मुलीने १३ व्या मजल्यावरून उडी मारून आत्महत्या केल्याची धक्कादायक घटना हडपसर भागातील अमानोरा टाउनशिप परिसरात बुधवारी दुपारी घडली. एवढ्या लहान वयातच किरकोळ कारणावरून मुलीने टोकाचे पाऊल उचलल्याने कुटुंबावर दुःखाचा डोंगर कोसळला आहे.
या घटनेत १४ वर्षीय शाळकरी मुलीचा मृत्यू झाला आहे. याप्रकरणी हडपसरपोलिस ठाण्यात अकस्मात मृत्यू, अशी नोंद करण्यात आल्याची माहिती हडपसर पोलिसांनी दिली. अल्पवयीन मुलगी, तिची आई, आठ वर्षांचा मुलगा, मावसभाऊ बुधवारी दुपारी घरी होते. दुपारी २:३० वाजेच्या सुमारास आईने मुलीला अभ्यासाला जा, असे सांगितले. या कारणावरून मुलीला राग आला. त्यानंतर मुलीने १३ व्या मजल्यावरील मोकळ्या जागेतून उडी मारली. या घटनेची माहिती मिळताच हडपसर पोलिसांनी घटनास्थळी धाव घेतली. मुलीचा उपचारापूर्वीच मृत्यू झाला होता. अल्पवयीन मुलीने आत्महत्या केल्याचा प्रकार उघडकीस आल्यानंतर रहिवाशांनी हळहळ व्यक्त केली.
सोशल मीडियाच्या आहारी गेल्याने शाळकरी मुले विचित्र वागू लागले आहेत. किरकोळ कारणावरून जीवन संपवण्याच्या घटनांमध्ये वाढ होताना दिसत आहे. मुलांना सद्यस्थितीत पालक, शिक्षक कोणाचाही धाक नसल्याचे अशा घटनांमधून उघड झाले आहे. अशा परिस्थतीत मुलांना समुपदेशनाची गरज असल्याचा सूर समाजात उमटू लागला आहे.