एकमेकांकडे पाहण्याच्या कारणावरुन 16 वर्षाच्या मुलाला मारहाण; चेहऱ्यावर केले मूत्र विसर्जन

शिवजयंती दिनी एकमेकाकडे पाहण्याच्या वादातून एका 16 वर्षीय मुलाला जबर मारहाण करुन त्याच्या चेहऱ्यावर मुत्र विसर्जन केल्याचा धक्कादायक प्रकार समाेर आला आहे.

पुणे : एकमेकाकडे पहाण्याच्या कारणातून झालेल्या वादात हडपसर परिसरातील एका १६ वर्षाच्या मुलाचे ५ जणांच्या टोळक्याने अपहरण करुन नग्न केले. त्यानंतर त्याला कोयता, बेल्टने मारहाण केली. मुलगा बेशुद्ध पडल्यानंतर त्याच्या तोंडावर या टोळक्याने मुत्र विसर्जन केल्याचा धक्कादायक प्रकार समोर आला आहे. हा प्रकार १२ मार्च रोजी मांजरी परिसरात घडला आहे. मारहाण झालेला मुलगा अजूनही बेशुद्धावस्थेत असून त्याच्यावर ससून रुग्णालयात उपचार सुरु आहेत. 

या प्रकरणी मुलाच्या आईने हडपसर पोलिसांकडे फिर्याद दिली आहे. त्यानुसार पोलिसांनी खुनाचा प्रयत्न केल्याचा गुन्हा दाखल करुन पाच जणांना अटक केली आहे. विनित सूर्यकांत बिरादार ऊर्फ रेड्डी (वय १९, रा. भेकराईनगर), शुभम राजाभाऊ जाधव (वय १९, रा. समर्थनगर, पिंपरी), देविदास ऊर्फ देवा घनश्याम पाहणे (वय २१, रा. क़ाळेपडळ, हडपसर), भारत विशाल राठोड(वय २१, रा. कुंजीर वस्ती, मांजरी), समील कलिंदर शेख (वय २१, रा. घुले वस्ती, मांजरी) अशी ताब्यात घेतलेल्यांची नावे आहेत.

पोलिसांनी दिलेल्या माहितीनुसार, मारहाण झालेला मुलगा त्याच्या आईवडिलांसह मांजरीत राहतो. शिवजयंतीच्या निमित्ताने १२ मार्च रोजी सायंकाळी साडे पाच वाजण्याच्या सुमारास हा मुलगा कार्यक्रमाला जातो, असे सांगून बाहेर गेला. त्यानंतर रात्री उशिरापर्यंत घरी आला नाही. त्यामुळे त्यांनी त्याचा शोध घेतल्यानंतरही न सापडल्याने त्याच्या आईने हडपसर पोलीस ठाण्यात हरविल्याची तक्रार दिली होती. हडपसर बीट मार्शलला एक मुलगा मांजरी रेल्वे ट्रॅकजवळ बेशुद्धावस्थेत पडलेला दिसून आला. पोलिसांनी त्याला उपचारासाठी ससून रुग्णालयात दाखल केले होते. मुलगा बेशुद्धावस्थेत असल्याने त्याची ओळख पटली नव्हती. दरम्यान, मारहाण झालेल्या एका मुलाचा व्हिडिओ सोशल मिडियाच्या माध्यमातून पोलिसांच्या हाती लागला. तेव्हा पोलिसांनी हरविलेल्याची तक्रार दिलेल्या मुलाच्या आईवडिलांना हा व्हिडिओ दाखविला. तो पाहून त्यांनी त्यातील मुलगा आमचाच असल्याने सांगितले. त्यानंतर त्यांनी ससून रुग्णालयात जाऊन मुलाला पाहिले. तेव्हाही हा मुलगा बेशुद्ध असल्याचे आढळून आले.

या व्हिडिओ अंगावर शहारे आणणारा आहे. या व्हिडिओवरुन पोलिसांना आरोपींची ओळख पटली असून त्यांना अटक केली आहे. हडपसर पोलीस अधिक तपास करीत आहेत.