पिंपरी : बांधकाम साईटवर काम करताना लिफ्टच्या डक्टमध्ये पडल्याने कामगाराचा मृत्यू झाला. ताथवडे येथे ३१ जानेवारी रोजी दुपारी चारच्या सुमारास ही घटना घडली. याप्रकरणी वाकड पोलीस ठाण्यात ७ मार्च रोजी गुन्हा दाखल करण्यात आला आहे.
प्रजेन बुधीराम बोरो (वय २५) असे मृत्यू झालेल्या कामगाराचे नाव आहे. याप्रकरणी रंजन बुधीराम बोरो (वय २८, रा. आसाम) यांनी फिर्याद दिली आहे. बांधकाम साईटचा मालक दीपेश उकाने याच्या विरोधात गुन्हा दाखल करण्यात आला आहे. ताथवडे येथे एका प्रकल्पाचे बांधकाम सुरु आहे. त्या साईटवर सहाव्या मजल्यावर काम करत असताना, बोरो हा लिफ्टच्या डक्टमधून खाली पडला. त्यात गंभीर जखमी झाल्याने त्याचा मृत्यू झाला. कामगारांच्या सुरक्षिततेची काळजी घेऊन लिफ्टच्या डक्टमध्ये सुरक्षा जाळी बसवली नसून हलगर्जीपणा केल्याच्या आरोपावरून गुन्हा दाखल करण्यात आला आहे. वाकड पोलीस तपास करीत आहेत.