कारण-राजकारण : पिंपरी-चिंचवड महापालिकेच्या इच्छुकांमध्ये धाकधूक

निवडणूक प्रक्रियेस गती आल्याने माजी नगरसेवक व इच्छुकांमध्ये उत्साह संचारला आहे. ते 'अॅक्शन मोड'मध्ये आले आहेत.

पिंपरी : महापालिका निवडणुकीस सव्वातीन वर्षांनंतर गती मिळाली आहे. त्यामुळे महायुती, महाविकास आघाडीतील प्रमुख पक्षांच्या इच्छुकांमध्ये धाकधूक सुरू झाली आहे. उमेदवारीसाठी हालचाली सुरू झाल्या असून, पिंपरी-चिंचवड शहरात स्वतंत्रपणे लढण्याची गळ स्थानिक नेत्यांना घातली जात आहे.

पिंपरी-चिंचवड महापालिका १२ मार्च २०२२ पासून बरखास्त झाली. कोरोना महामारी व इतर कारणांमुळे महापालिका निवडणुका वारंवार पुढे ढकलल्या जात होता. तब्बल सव्वातीन वर्षांनंतर निवडणुकीचे बिगुल वाजले आहे. राज्य सरकारच्या नगरविकास विभागाने महापालिका आयुक्तांना प्रभागरचना करण्याचे आदेश दिले आहेत. त्यानुसार महापालिकेने चार सदस्यीय प्रभाग रचना तयार करण्याचे काम सुरू केले आहे. त्यामुळे निवडणूक कामकाजाला गती मिळाली आहे.

आता माजी नगरसेवक व इच्छुकांमध्ये उत्साह संचारला आहे. ते ‘ॲक्शन मोड’मध्ये आले आहे. महायुती किंवा महाविकास आघाडी झाल्यास या निवडणुकीत आपला पत्ता कट होईल, या भीतीने अनेक जण धास्तावलेही आहेत. महायुतीतील भाजप व राष्ट्रवादी काँग्रेस आणि महाविकास आघाडीतील राष्ट्रवादी काँग्रेस शरदचंद्र पवार पक्ष व शिवसेना उद्धव बाळासाहेब ठाकरे या प्रमुख पक्षांतील इच्छुक युती किंवा आघाडी होऊ नये या मताचे आहेत. कारण, तसे झाल्यास अनेकांच्या उमेदवारीवर गदा येण्याची शक्यता आहे.

स्वबळावर लढणे योग्य असल्याचे दाखले

स्वतंत्रपणे लढण्यासाठी स्थानिक तसेच, मुंबईतील नेत्यांना गळ घातली जात आहे. त्यासाठी प्रयत्न केले जात आहेत. शहरात पक्ष वाढीसाठी स्वबळावर लढणे योग्य असल्याचे दाखले दिले जात आहेत. त्यात त्यांना किती यश मिळते, हे लवकरच स्पष्ट होणार आहे.