लॉजमधील वेश्या व्यवसायाचा पर्दाफाश; दोन महिलांची सुटका

संबंधित व्यक्ती महिलांना पैशांचे आमिष दाखवून त्यांच्याकडून वेश्या व्यवसाय करून घेत होता

पिंपरी : लॉजमध्ये सुरू असलेल्या वेश्या व्यवसायाचा पर्दाफाश करण्यात आला. लाॅजवर छापा मारून कारवाई करत दोन महिलांची वेश्या व्यवसायातून सुटका केली. पिंपरी-चिंचवड गुन्हे शाखेच्या अनैतिक मानवी वाहतूक प्रतिबंधक कक्षाने मंगळवारी (दि. २०) सायंकाळी साडेसहाच्या सुमारास ही कारवाई केली. वडमुखवाडी येथील खडीमशीन रस्त्यावरील सनशाईन लॉज येथे कारवाई केली.

नितीन रावसाहेब कोकरे (२८, रा. विश्रांतवाडी, पुणे) असे अटक केलेल्या लॉज मालकाचे नाव आहे. याप्रकरणी अनैतिक मानवी वाहतूक प्रतिबंधक कक्षातील पोलिस हवालदार मारुती करचुंडे यांनी दिघी पोलिस ठाण्यात फिर्याद दिली.

अनैतिक मानवी वाहतूक प्रतिबंधक कक्षाचे पोलिस निरीक्षक देवेंद्र चव्हाण यांनी दिलेल्या माहितीनुसार, दिघी पोलिस ठाण्याच्या हद्दीत वडमुखवाडी येथील खडीमशीन रस्त्यावर सनशाईन लॉजमध्ये वेश्या व्यवसाय सुरू असल्याची माहिती मिळाली. संबंधित व्यक्ती महिलांना पैशांचे आमिष दाखवून त्यांच्याकडून वेश्या व्यवसाय करून घेत होता. त्यानुसार पोलिसांनी सनशाईन लॉजवर मंगळवारी सायंकाळी छापा मारून कारवाई केली. या कारवाईमध्ये लॉज मालक नितीन कोकरे याला ताब्यात घेतले. तसेच पीडित दोन महिलांची सुटका केली.  दोन हजार ९० रुपये रोख रक्कम जप्त केली. 

पोलिस उपायुक्त (गुन्हे) संदीप डोईफोडे, सहायक आयुक्त (गुन्हे) सतीश माने यांच्या मार्गदर्शनाखाली अनैतिक मानवी वाहतूक प्रतिबंधक कक्षातील पोलिस निरीक्षक देवेंद्र चव्हाण, पोलिस अंमलदार सुनील शिरसाठ, भगवंता मुठे, मारुती करचुंडे, वैष्णवी गावडे, संगीता जाधव, रेश्मा झावरे, सोनाली माने यांनी केली.