स्पा सेंटरच्या आड देहविक्रीचा धंदा; सात महिलांची सुटका

सांगवी पोलिस याबाबत अधिक तपास करीत आहेत.

पिंपरी : पिंपरी-चिंचवड गुन्हे शाखेच्या अनैतिक मानवी वाहतूक प्रतिबंधक कक्षाने पिंपळे सौदागरमध्ये धाड टाकत प्रतिष्ठित ‘द ओरा थाई स्पा’च्या नावाखाली सुरू असलेला वेश्या व्यवसाय उध्वस्त केला. सात महिलांची सुटका करीत स्‍पा सेंटरच्‍या मालकास अटक केली आहे.

स्पामध्ये उच्चभ्रू ग्राहकांसाठी मसाजच्या नावाखाली देहविक्री केली जात असल्याची खात्रीशीर माहिती अनैतिक मानवी वाहतूक प्रतिबंधक विभागाला मिळाली. त्यानुसार पथकाने बनावट ग्राहक पाठवून शहानिशा केली आणि नंतर ठिकाणी छापा टाकला. या कारवाईत सात महिलांची सुटका केली असून त्यापैकी ५ ईशान्य राज्यांमधील (३ नागालंड, १ मिजोराम, १ त्रिपुरा) तसेच केरळ आणि महाराष्ट्रातील प्रत्येकी एक असे एकूण सात पीडित महिलांची सुटका करण्यात आली.

अभिजित लाॅरेन्स (वय ३०, रा. पिंपळे सौदागर, मूळ रा. तिरुअनंतपुरम, केरळ) असे अटक केलेल्‍या स्‍पा मालकाचे नाव आहे. याबाबत गुन्‍हे शाखेच्‍या अनैतिक मानवी वाहतूक प्रतिबंध कक्षातील पोलिस हवालदार श्रद्धा राजेश भरगुडे (वय ३९) यांनी शनिवारी (दि. २९) सांगवी पोलिस ठाण्‍यात फिर्याद दिली आहे. 

पोलिसांनी दिलेल्‍या माहितीनुसार, अभिजित लाॅरेन्स हा महिलांना पैशांचे आमिष दाखवून त्यांना देहव्यापारास प्रवृत्त करत असत. या माध्यमातून तो मोठ्या प्रमाणात आर्थिक फायदा मिळवत होता, असे तपासात समोर आले आहे. संशयिताविरुद्ध भारतीय न्याय संहिता व पिटा कायद्यान्वये सांगवी पोलिस ठाण्यात गुन्हा नोंद करण्यात आला आहे. सांगवी पोलिस याबाबत अधिक तपास करीत आहेत.

पोलिस आयुक्त विनय कुमार चौबे, सह आयुक्त डॉ. शशिकांत महावरकर, अप्पर आयुक्त सारंग आवाड, उपायुक्त डॉ. शिवाजी पवार, सहायक आयुक्‍त डाॅ. विशाल हिरे यांच्या मार्गदर्शनाखाली वरिष्ठ पोलिस निरीक्षक नितीन गिते, सहायक निरीक्षक भास्कर पुल्ली व पथकाने ही कारवाई केली.